रोनाल्डोको अर्को सपना पूरा

काठमाडौं। पोर्चुगलका ४० वर्षीय स्टार क्रिस्टियानो रोनाल्डोले अर्को एक उपाधि आफ्नो पोल्टामा थपेका छन्। थप कीर्तिमान र अझ धेरै सम्मान कमाएका छन्।

आइतबार नेसन्स लिग जितेपछि उनी खुसीका आँसु खसाल्दै थिए। उनले स्पेनविरुद्धको फाइनलमा टोलीलाई २-२ को बराबरीमा फर्काउन गोल गरे। त्यसपछि पेनाल्टी सुटआउटमा पोर्चुगलले ५-३ ले जित हासिल गर्‍यो।

‘मैले आफ्नो करिअरमा क्लबबाट धेरै उपाधि जितेको छु। तर, पोर्चुगलबाट जित्नु सबैभन्दा राम्रो अनुभूती हो। यी खुसीका आँसु हुन्। लक्ष्य पूरा भयो, अपार खुसी मिल्यो,’ उनले भने।

खेलअघि वार्मअप गर्न उनी सबैभन्दा पहिले मैदानमा दौडिए। यो देखेर पोर्चुगल समर्थकबीच ठूलो उत्साह छायो। धेरै समर्थक उनले वार्मअप गरिरहेको भिडियो मोबाइलमा कैद गरिरहेका देखिन्थे।

सायद यो राष्ट्रिय टोलीबाट उनको अन्तिम अन्तर्राष्ट्रिय प्रतियोगिता हो। उनले पनि आफू सधैं खेल्न नसक्ने स्वीकार गरेका छन्। त्योभन्दा तीन दिनअघि उनले पोर्चुगललाई २५ वर्षपछि पहिलो पटक जर्मनीमाथि जित दिलाएका थिए। उक्त सेमिफाइनलमा उनले निर्णायक गोल गर्दै २–१ को जित दिलाए।

फाइनलमा पनि उनले टोलीलाई अघि बढाइरहेका थिए। यद्यपि, खेलको सुरुआतमा स्पेनका डिफेन्डरले उनलाई राम्रोसँग चल्न दिएनन्। स्पेनका मार्टिन जुबिमेन्डीले खेलको पहिलो गोल गरे। तर, नुनो मेन्डेसले गोल फर्काएर पोर्चुगललाई बराबरीमा ल्याए। त्यसपछि मिकेल ओयारजाबालले फेरि अग्रता दिलाए र पहिलो हाफसम्म स्पेन २-१ ले अगाडि रह्यो।

तर, ६१ औं मिनेटमा मेन्डेसको ‘डिफ्लेक्टेड क्रस’बाट रोनाल्डोले सही समयमा सही स्थानमा रहेर बराबरी गोल गरे। त्यसपछि समर्थकबीच खुसीको माहोल छायो। यो रोनाल्डोको पोर्चुगलका लागि १३८औं अन्तर्राष्ट्रिय गोल हो। रोनाल्डोले आफ्नो कीर्तिमानी २२१औं खेलमा पनि निकै प्रयास गरे। तर, अन्ततः थाकेका कारण ८८औं मिनेटमा मैदान छोडे। समर्थकले उभिएर उनलाई सम्मानजनक बिदाइ दिए भने प्रशिक्षक रोबर्टो मार्टिनेजले अंगालो हाल्दै स्यावासी दिए।

‘मैले खेलअघि नै चोटको महसुस गरिरहेको थिएँ। केही समयदेखि यो महसुस भइरहेको थियो। तर, राष्ट्रिय टोलीका लागि यदि खुट्टा भाँच्नुपर्ने भए पनि म भाँच्थे। यो उपाधिका लागि हो। मैले सबै दिनुपर्ने थियो र मैले त्यो गरें,’ उनी भन्छन्।

उनको भविष्य अहिले अनिश्चित छ। साउदी क्लब अल-नसरसँग उनको सम्झौता जुन महिनाको अन्त्यसम्म मात्रै छ। सिजनको अन्तिम खेलपछि उनले सामाजिक सञ्जालमा ‘यो अध्याय समाप्त भयो लेखेका थिए। शनिबार उनले क्लब विश्वकपमा नजाने मनस्थितिमा आफू पुगेको खुलासा गरेका थिए। 

‘मैले देशका क्लबाट खेलें। तर, जब कुरा पोर्चुगलको हुन्छ, त्यो सधैं विशेष महसुस हुन्छ,’ रोनाल्डोले भने।