एसियन कप छनोटमा श्रीलंकाबाहेक साफका सबै टोली पराजित

काठमाडौं। एएफसी एसियन कप छनोटअन्तर्गत तेस्रो चरणको दोस्रो खेलमा मंगलबार दक्षिण एसिया (साफ) का श्रीलंकाबाहेक सबै ६ टोली पराजित भएका छन्।

यी सात टोलीले विभिन्न प्रस्पर्धीसँग खेलेका थिए। नेपालले आफ्नो दोस्रो खेलमा फिफा वरीयतामा १५ स्थान तल रहेको लाओससँग २–१ को हार बेहोर्‍यो। पछिल्ला ५ भेटमा अपराजित रहेको नेपालले पहिलोपल्ट हार बेहोरेको हो। यता, पाकिस्तानलाई म्यानमार, बंगलादेशलाई सिंगापुर, भारतलाई हङकङ र माल्दिभ्सलाई टिमोर लिस्टेले समान १–० ले पाखा लगायो।

ब्रुनाइसँग भुटान २–१ ले पराजित हुँदा श्रीलंकाले भने चाइनिज ताइपेईलाई ३–१ ले पराजित गर्न सफल रह्यो।

चाइनिज ताइपेई फिफा वरीयतामा १६६औं स्थानमा छ। श्रीलंका भने २००औं स्थानमा छ। नेपाली राष्ट्रिय टोलीसम्मेत सम्हालिसकेका अब्दुल्ला अल्मुताइरी मुख्य प्रशिक्षक रहेको श्रीलंकाले वरीयतामा आफूभन्दा ३६औं स्थानमाथि रहेको चाइनिज ताइपेईसँग इतिहासमै सबैभन्दा ठूलो जित निकालेको हो।

२००८ मा भएको मैत्रीपूर्ण खेलमा यी दुई टोलीले २–२ को बराबरी खेलेका थिए। त्यसको एक वर्षपछि भएको अर्को मैत्रीपूर्ण खेलमा भने श्रीलंकाले २–१ को जित निकालेको थियो। त्यसयता यी दुई टोलीबीच १४ वर्षपछि भेट भएको हो।