दबाबमा इटली

काठमाडौं। इटली २०२६ विश्वकप छनोटको पहिलो छनोट खेलमै दबाबमा परेको छ। उल्भोल स्टेडियममा शुक्रबार नर्वेले २५ वर्षपछि पहिलोपटक इटलीलाई ३–० ले पराजित गरेको हो।

नियमित खेलाडी चोटका कारण अनुपस्थित रहे भने अन्यले प्रभाव जमाउन सकेनन्। सिरी ‘ए’ का उत्कृष्ट गोलकर्ता माटेओ रेटेगुइले समेत प्रभावशाली प्रदर्शन गर्न सकेनन्।

रक्षात्मक खेलाडी एलेस्सान्द्रो बुओन्जोर्नो, माट्टिया गाब्बिया, म्यानुएल लोकाटेली र मोइज किन घाइते रहे।  एर्लिङ हालान्डलाई मार्क गर्न बोलाइएको सेन्ट्रल डिफेन्डर फ्रान्चेस्को एचेर्बीले आउन अस्वीकार गरे। मुख्य प्रशिक्षक लुसियानो स्पालेटीको तीन डिफेन्डरयुक्त रक्षात्मक योजना नर्वेलाई रोक्न असफल भयो।

हालान्डले प्लेमेकर मार्टिन ओडेगार्डले उपलब्ध गराइदिएको बललाई इटलीका गोलकिपर जियानलुइगी डोनारुम्मालाई चक्मा दिँदै पहिलो हाफ सकिन तीन मिनेटअघि जाली चुमाएका हुन्। यो नर्वेको खेलमा तेस्रो गोल थियो। 

हालान्डको भने नर्वेका लागि यो ४२ खेलमा ४१औं गोल हो। हालान्डले यसअघि मोल्डोवाविरुद्ध ५–० र इजरायलविरुद्ध ४–२ को जितमा पनि गोल गरेका थिए। नर्वे युरोपेली समूह ‘आई’ मा अपराजित छ। शीर्ष स्थानमा रहेको नर्वेले ३ खेलबाट ९ अंक पुर्‍याएको छ।

अलेक्ज्यान्डर सोरलोथले ओस्लोस्थित उल्भोल स्टेडियममा एन्टोनियो नुसाको उत्कृष्ट पासमा डोनारुम्मालाई छलाउँदै १४औं मिनेटमै पहिलो गोल गरे। त्यसपछि २० वर्षीय नुसाले दुई डिफेन्डरलाई छक्याउँदै बक्सभित्रबाट दोस्रो गोल गर्दै इटलीको डिफेन्सलाई थप दबाबमा राखे।

लगातार दुई विश्वकप (२०१८ र २०२२) गुमाएको इटली यसपटक पुनः दबाबमा छ। समूह विजेता मात्रै सिधै विश्वकप पुग्नेछ भने दोस्रो हुने टोली प्लेअफमा जानेछ। प्लेअफबाटै इटलीले अघिल्ला दुई संस्करण गुमाएको थियो।

विश्वकप चारपटक जितिसकेको इटलीले सन् १९५८ मा मात्रै छनोट हुन सकेको थिएन (प्लेअफमा पनि नपुगेको)। अब इटलीले सोमबार मोल्डोभासँग खेल्नेछ भने नर्वे एस्टोनियाविरुद्ध उत्रनेछ।