काठमाडौं। लिभरपुलले बार्सिलोनाबाट फरवार्ड लुइस डियाजका लागि आएको प्रस्ताव अस्वीकार गरेको छ।
स्पेनिस च्याम्पियन बार्सिलोनाले आगामी सिजनका लागि टिम मजबुत बनाउने प्रयास गरिरहेको छ।
तर, बार्सिलोनाले डियाजलाई भित्र्याउन कति मूल्य चुकाउन तयार थियो भन्ने स्पष्ट खुलाएको थिएन। लिभरपुलले भने डियाज बिक्रीमा नरहेको जानकारी दिएको थियो।
२८ वर्षीय कोलम्बियन फरवार्ड डियाजले लिभरपुललाई प्रिमियर लिग उपाधि जिताउन १७ गोल गरेका थिए। च्याम्पियन्स लिगमा बायर लेभरकुसेनविरुद्ध ह्याट्रिक गरेका उनले नयाँ प्रशिक्षक आर्ने स्लटको योजनामा महत्त्वपूर्ण आक्रमणकारी भूमिका निर्वाह गरेका छन्।
गत महिना बार्सिलोनाका स्पोर्टिङ डाइरेक्टर डेकोले क्याटालान रेडियो आरएसी वानसँगको अन्तर्वार्तामा डियाज र रास्फोर्डबारे भनेका थिए,‘हामीलाई लुइस मनपर्छ, रास्फोर्ड पनि। त्यस्ता धेरै खेलाडी छन्, जसको सूची हामीले वर्षौंअघिदेखि तयार पारेका छौं।’
लिभरपुल आफैं पनि समर स्थानान्तरणमा टिमलाई सुदृढ बनाउन खोजिरहेको छ। जर्मनीका मिडफिल्डर फ्लोरियन विर्ट्ज क्लबको मुख्य टार्गेट हुन्। तर, लिभरपुलले डियाजलाई आगामी सिजनमा प्रिमियर लिग उपाधि रक्षा र च्याम्पियन्स लिगमा उत्कृष्ट प्रदर्शन गर्ने योजनाको केन्द्रमा राखेको छ।
डियाज सन् २०२२ मा पोर्टोबाट ३७.५ मिलियन पाउन्डमा लिभरपुल आएका थिए। त्यसयता उनले लिभरपुलबाट १४८ खेलमा ४१ गोल गरेका छन्। प्रिमियर लिग, एफए कप र दुई इएफएल कप जितेका छन्।
-1739018575.jpg)
