काठमाडौं। पोर्चुगलका ४० वर्षीय स्टार फरवार्ड क्रिस्टियानो रोनाल्डोले बुधबार राति एउटा यस्तो अनुभूति महसुस गरे, जुन उनले यसअघि कहिल्यै महसुस गरेका थिएनन्। त्यो हो जर्मनीवरुद्धको जित।
पाँच पटक उनले जर्मनीविरुद्ध खेलेका थिए। तर, ती सबै खेलमा पोर्चुगलले हार बेहोर्यो। पोर्चुगलले अन्तिमपल्ट सन् २००० को युरोकपमा सर्जियो कन्सेसेओको ह्याट्रिकको मद्दतले जर्मनीलाई ३–० ले पराजित गरेको थियो। त्यसयता पोर्चुगल यस्तै जितको पर्खाइमा थियो। त्यो पर्खाइ अन्तत: २५ वर्षपछि समाप्त भएको छ। नेसन्स लिगको सेमिफाइनलमा उनै रोनाल्डोको कप्तानीमा मैदान उत्रिएको टोलीले जर्मनीलाई २–१ ले हराउँदै फाइनलमा स्थान सुरक्षित गर्न सफल भएको छ।
पोर्चुगलका लागि निर्णायक गोल रोनाल्डोले गरे। त्यो खाली पोस्टमा सजिलो ‘ट्याप–इन’ थियो। यो उनको १३७औं अन्तर्राष्ट्रिय र करिअरको ९३७औं गोल हो। जर्मनका पूर्वखेलाडी जर्गेन क्लिन्समनले रोनाल्डोको यो प्रयासको खुलेर प्रशंसा गरेका छन्। भन्छन्,‘यो अद्वितीय हो। ४० वर्षको उमेरमा उनले जुन स्तरमा खेलेका छन्, यस्तो लाग्छ अब उमेरले उनलाई रोक्न सक्दैन।
रोनाल्डोले आफूलाई टिमप्रति समर्पित गरेका छन्। फर्केर डिफेन्समा सहयोग गरेका छन्। टोलीका अन्य सहकर्मीसँग उनले निरन्तर सहकार्य गरेका छन्। यो उनको असली नेतृत्वको परिचय हो। बक्सभित्र उनी अझै पनि टोलीको उत्कृष्ट फिनिसरमध्ये एक हुन्। उनको ‘एटिच्युड’ नै टिममा फरक ल्याउने तत्व हो। यदि उनले आफ्नो टिमलाई यसरी नै सकारात्मक बनाइराखे आउँदो वर्ष अमेरिका, क्यानडा र मेक्सिकोमा हुने विश्वकपसम्म पनि जित्न सक्ने क्लिन्समन बताउँछन्।
‘कतारमा लिओनल मेसीले आफ्नो करिअरको उत्तरार्धमा चमत्कार देखाएका थिए (अर्जेन्टिनालाई आफ्नो कप्तानीमा विश्वकप दिलाएको)। अब त्यस्तै सम्भावना रोनाल्डोमा पनि देखिएको छ। यो असाधारण पुर्तगाली टिम हो,’ उनी भन्छन्।
पोर्चुगलका मुख्य प्रशिक्षक रोबर्टो मार्टिनेजले जर्मनीविरुद्ध जितलाई ऐतिहासिक मान्छन्। साथै, उनले मिडफिल्डर भिटिन्हालाई यस वर्षको ‘बालोन डी’ओर’ को मुख्य दाबेदार मानेका छन्। ‘पिएसजीले जितेका सबै उपाधिहरूमा भिटिन्हाको ठूलो योगदान छ। उनको शैली र प्रभावकारिताका कारण उनी यस वर्षको बलोन डी’ओरका योग्य दाबेदार हुन्,’ मार्टिनेजले भने।
रोनाल्डोबारे बोल्दै उनले थपे, ‘उनी सधैं सुधार गर्न चाहन्छन्। उनको भोक अझै मरेको छैन र त्यो ऊर्जा टिममा फैलिएको छ। उनलाई रेकर्डले होइन, प्रत्येक दिन आफैंलाई सुधार्ने चाहनाले अघि बढाउँछ। त्यो निकै दुर्लभ कुरा हो।’ जर्मनीले पहिलो गोल गरेर अग्रता लिएको थियो। तर, पोर्चुगलले उत्कृष्ट पुनरागमन गर्यो।
सर्जियो कन्सेसेओका छोरा फ्रान्सिस्कोले मैदान छिरेको ५ मिनेटमै गोल गरे। त्यसको अर्को ५ मिनेटपछि रोनाल्डोले। प्रशिक्षक मार्टिनेजका अनुसार यो खेल शारीरिकभन्दा पनि मनोवैज्ञानिक रूपमा जित्न चुनौतीपूर्ण थियो।
‘जर्मनीजस्तो टिमविरुद्ध त्यो पनि उनीहरूको घरेलु मैदानमा। यो टोलीसँग खेल्न स्पष्ट सोच र उच्च तीव्रता आवश्यक हुन्छ। उनीहरूले जोखिम मोलेर खोल्छन्, वान–अन–वान स्थिति सिर्जना गर्छन्। हामी मनोवैज्ञानिक रूपमा तयार हुनुपर्यो,’ उनी भन्छन्,‘
यो दुई दिनको तयारीले होइन, दुई वर्षभन्दा बढीको सामूहिक परिश्रमले सम्भव भएको हो। म टिमप्रति गर्व गर्छु।’
अब पोर्चुगलले नेसन्स लिगको फाइनल खेल्नेछ। यो टोलीसँग खेल्न फ्रान्स र स्पेन भिड्दैछन्।
-1739018575.jpg)
