काठमाडौं। नेपाली महिला राष्ट्रिय फुटबल टोली हाल नयाँ मोडमा उभिएको छ।
डेढ दशकसम्म साफ च्याम्पियन बन्ने सपनामा अल्झिएको यो टोली अहिले एएफसी महिला एसियन कप २०२६ छनोट हुँदै विश्वकप २०३१ सम्म पुग्ने महत्वाकांक्षामा ढल्दैछ।
यस महत्त्वपूर्ण संक्रमणकालमा टोलीको जिम्मेवारी सम्हालिरहेका छन्– मुख्य प्रशिक्षक राजेन्द्र तामाङले। अनुभवका हिसाबले खारिएका मानिए पनि तामाङको नेतृत्वमा टोलीले हालसम्म कुनै उपाधि हात लाग्न सकेको छैन।
उनले वाफ च्याम्पियनसिप, साफ महिला च्याम्पियनसिप र चारदेशीय आमन्त्रण प्रतियोगितामा टोलीको नेतृत्व गरे। तर, अहिलेसम्मको चुनौतीले उपलब्धिको स्वाद चाख्न भने सकेको छैन। त्यसैले नेपाली टोली उनको विकल्प खोज्ने तयारीमा छ।
यो विकल्प उनले नै सुझाएका हुन्। उनको योजनाअनुसार नै अखिल नेपाल फुटबल संघ (एन्फा)ले प्रो–लाइसेन्स प्रशिक्षकको आह्वान गरिसकेको छ। तर, राजेन्द्रकै प्रशिक्षणमा नेपालले थाइल्यान्डसँग दुई मैत्रीपूर्ण खेल खेल्दै छ।
यसमा पनि तामाङले नै टोली सम्हाल्ने छन्। यो खेल सकिएसँगै नेपालले एएपसी एसियन कप छनोटका लागि २५ दिनको समय पाउने छ। तर, एन्फाले ल्याउने भनेको नयाँ विदेशी प्रशिक्षकको भन्ने अझै टुंगो लाग्न सकेको छैन। हालसम्म २१ जनाले नेपाली टोलीको प्रशिक्षक बन्न आवेदन हालेका छन्। तीबाट दुई जनालाई सर्ट लिस्टमा राखिएको छ।
एन्फा प्रवक्ता सुरेश शाह अब छिट्टै प्रशिक्षक टुंगो लाग्ने बताउँछन्। ‘चाँढै प्रशिक्षक फाइनल गर्छौं,’ उनले भने। एएफसीले सार्वजनिक गरेको खेलतालिका अनुसार नेपालले पहिलो खेलमै लाओस प्रतिद्वन्द्वी पाएको छ।
यी दुईबीचको खेल २९ जुनमा हुनेछ। नेपाल र लाओस समूह ‘एफ’ मा परेका छन्। यो समूहमा उज्बेकिस्तान र श्रीलंका पनि छन्।
यो समूहको खेल उज्बेकिस्तानमा हुने तय छ। नेपाल फिफा वरीयतामा ९९औं स्थानमा छ। लाओस भने आठ स्थान तल अर्थात् १०७औं स्थानमा छ। नेपालले दोस्रो खेल श्रीलंका र अन्तिम खेल घरेलु टोली उज्बेकिस्तानसँग खेल्नेछ। समूहको शीर्ष स्थानमा रहने टोलीले अस्ट्रेलियामा हुने एसिया कपमा स्थान बनाउने छ।
एन्फा अध्यक्ष पंकजविक्रम नेम्वाङले पनि छनोटअघि नै प्रशिक्षकको टुंगो लाग्ने बताए। ‘प्रशिक्षक छनोट समितिले काम गरिरहेको छ। अहिले राजेन्द्र तामाङकै प्रशिक्षणमा खेले पनि एसियन कप छनोट भने नेपालले नयाँ प्रशिक्षकको अन्डरमा खेल्नेछ,’ उनले भने।
-1748528310.jpeg)
