काठमाडौं। महामन्जुश्री सेकेन्डरी स्कुलको आयोजनामा प्रथम महामन्जुश्री कप थ्री बाइ थ्री बास्केटबल प्रतियोगिता बिहीबारदेखि हुने भएको छ ।
प्रतियोगितामा ३ विधामा विभिन्न ४१ विद्यालयका ६३ टिमको सहभागिता रहने मंगलबार आयोजित पत्रकार सम्मेलनमा महामन्जुश्रीका प्रिन्सिपल चूडामणि मरासिनीले जानकारी गराए ।
सिनियर ब्वाइजमा ३२, जुनियर ब्वाइजमा १५ र सिनियर गल्र्समा १६ टिमले भाग लिने छन् ।
प्रतियोगिता सञ्चालन गर्न करिब १ लाख ८० हजार रुपैयाँ खर्च हुने महामन्जुश्रीका प्रशासन प्रमुख केशव मरासिनीले जानकारी दिए ।
लिग कम नकआउट आधारमा दुईदिनसम्म चल्ने प्रतियोगिताका खेलहरु नागर्जुन नगरपालिका वडा ५, सीतापाइलास्थित आयोजकको आफ्नै कोर्टमा खेलाइने छ ।
प्रिन्सिपल मरासिनीले विद्यार्थीलाई खेलकुदप्रति आकर्षित गर्न र प्रतिभावन खेलाडीको पहिचान गर्न प्रतियोगिता आयोजना गरिएको बताए ।
पत्रकार सम्मेलनमा महामन्जुश्रीकी भाइस प्रिन्सिपल हेमलता चाम्लिङ, प्रशिक्षक शैलेश श्रेष्ठ र खेलकुद शिक्षक लक्ष्मण फुयालको पनि उपस्थिति रहेको थियो ।
