सलाहलाई चौथो गोल्डेन बुट, एकै सिजनमा नयाँ कीर्तिमान
काठमाडौं। लिभरपुलका फरवार्ड मोहमद सलाहले इङ्लिस प्रिमियर लिग २०२४–२५ सिजनमा चौथोपल्ट गोल्डेन बुट जितेका छन्।
उनले यस सिजन २९ गोल गर्दै शीर्ष स्कोरर बने, जुन न्यूक्यासलका अलेक्ज्यान्डर इसाकभन्दा ६ गोल बढी हो।
आइतबार क्रिस्टल प्यालेसविरुद्धको खेलमा सलाहले अन्तिमतिर गोल गर्दै लिभरपुललाई हारबाट जोगाए। उक्त खेल १–१ को बराबरीमा सकिएको थियो। योसँगै आफ्नो व्यक्तिगत उपलब्धिमा अर्को कीर्तिमान थपे।
सलाह यसअघि २०१७–१८ मा ३२ गोल गर्दै एकल रूपमा शीर्ष स्कोरर बनेका थिए। २०१८–१९ र २०२१–२२ मा अन्य खेलाडीहरूसँग संयुक्त रूपमा गोल्डेन बुट जितेका थिए।
यो सिजनमा सलाहले १८ असिस्ट पनि दिएका छन्। योसँगै उनले एकै सिजनमा सबैभन्दा धेरै गोलमा संलग्न हुने (गोल + असिस्ट = ४७) कीर्तिमान एन्डी कोल (१९९३–९४) र एलन शियरर (१९९४–९५) को बराबरी गरेका छन्।
उल्लेखनीय कुरा के छ भने कोल र शियररले उक्त कीर्तिमान ४२ खेलको सिजनमा बनाएका थिए। तर, हाल प्रिमियर लिग ३८ खेल मात्रै खेलिन्छ। सलाहले त्यही संख्या भित्रै यो अद्वितीय उपलब्धि दोहोर्याएका हुन्।
