काठमाडौं। बार्सिलोनाले आफ्नो ला लिगा उपाधि जितको सिजन ३–० को सानदार जितसँगै सम्पन्न गरेको छ।
आइतबार अन्तिम खेलमा एथ्लेटिक बिल्बाओविरुद्ध रोबर्ट लेवान्डोस्कीले दुई गोल गरे। तर, उनी लिगको उच्च गोलकर्ता बन्न भने सकेनन्।
लेवान्डोस्कीले १४औं र १७औं मिनेटमा गोल गर्दै लिग सिजन २७ गोलमा टुंग्याए। तर, रियल मड्रिडका किलियन एमबाप्पे भने शीर्ष स्थानमा रहे। उनले शनिबार रियल सोसिडाडविरुद्ध दुई गोल गर्दै यो सिजन ३१ गोल पुर्याए।
चोटका कारण केही महत्त्वपूर्ण खेल गुमाएका लेवान्डोस्कीले यसअघिको अन्तिम गोल एप्रिल ९ मा बोरुसिया डर्टमुन्डविरुद्ध च्याम्पियन्स लिगमा गरेका थिए। लिगमा भने मार्चमा गिरोनाविरुद्ध गोल गरेका थिए।
सिजनको अधिकांश समय शीर्ष गोलकर्ता रहेका लेवान्डोस्कीलाई एमप्पेको अन्तिम ६ खेलमा १० गोलको सानदार प्रदर्शनले पछाडि पार्यो।
बार्सिलोनाले यो सिजन १०२ गोल गर्दै मात्र ३९ गोल खायो। ६३ को गोलअन्तर सहित लिग टुंग्यायो। बार्सिलोनाले २८ खेल जित्यो। चार बराबरी र ६ हार बेहोर्न पर्यो।
बार्सिलोनाले कुल ८८ अंक जोड्यो, दोस्रो स्थानको रियलभन्दा चार अंकले अघि रह्यो। तेस्रो स्थानको एट्लेटिको मड्रिडभन्दा १२ अंकले अघि रहन सफल भयो।
एथ्लेटिक बिल्बाओ भने हारका बाबजुद चौथो स्थानमा रहँदै १० वर्षपछि च्याम्पियन्स लिग स्थान पक्का गर्न सफल भयो। ३६ वर्षीय लेवान्डोस्कीले बार्सिलोनामा तीन सिजनमा कुल १०१ गोल पूरा गरेका छन्।
उनले यस सिजन ४२ गोल गरेका हुन्। अघिल्लो सिजन २६ र पहिलो सिजन ३३ गोल गरेका थिए। ‘सबथोक हाम्रो नियन्त्रणमा थियो,’ लेवान्डोस्कीले भने, ‘यो सिजन लगभग भरिपूर्ण रह्यो। हामी यो क्षणको आनन्द लिनुपर्छ।’
बार्सिलोनाका प्रशिक्षक हान्सी फ्लिकले टोलीको प्रशंसा गर्दै जसरी सुरु गरेको त्यसरी नै अन्त्य भएको बताए। उनले आफ्नो टोलीले उत्कृष्ट प्रदर्शन गरेको बताए।
