फर्किएको ‘मेसी म्यानिया’

काठमाडौं। कप्तान लिओनल मेसीले पछिल्ला केही कमजोर नतिजापछि आफ्ना टिममेटहरूलाई एकजुट भएर खेल्नुपर्ने प्रेरणात्मक सन्देश दिएका थिए। र, आइतबार बिहान फिलाडेल्फिया युनियनविरुद्धको खेलमा उनले आफ्नै शब्दलाई मैदानमा उतारे।

आठपल्टका बलोन डी’ओर विजेता मेसीले खेलको ८७औं मिनेटमा फ्रिकिकमार्फत गोल गर्दै इन्टर मियामीलाई ३–२ मा फर्काए। त्यसपछि इन्जुरी समयको ९५औं मिनेटमा उनले टेलास्को सेगोभियाको बराबरी गोलमा असिस्ट प्रदान गरे। खेल ३–३ को रोमाञ्चक बराबरीमा टुंगियो।

अर्लान्डोसँगको हारपछि मेसीले दुर्लभ टेलिभिजन अन्तर्वार्तामा टिमलाई मिलेर अघि बढ्न आग्रह गरेका थिए। र, यो खेलमा उनले आफैंले नेतृत्व गरेर टिमलाई त्यसैअनुसार प्रदर्शन गराए।

१९ वर्षीय युनियन गोलकिपर एन्ड्र्यु रिकलाई अन्ततः मेसीले अन्त्यतिर छक्याउँदै गोल गरे। सुवारु पार्क रंगशालामा उपस्थित हजारौं दर्शकका लागि त्यो क्षण अविस्मरणीय बन्यो।

युनियनका क्विन सुलिभानले पहिलो गोल गरे। ताइ बारिबोले दुई गोल थपे। जारी सिजनमा उनको यो १३औं गोल हो। मियामीका तादेओ एल्लेन्देले दोस्रो हाफमा गोल गर्दै खेललाई २–१ मा ल्याए।

फर्किएको ‘मेसी म्यानिया’
सन् २०२३ को भ्रमणमा टिकेटको मूल्य एक हजार डलर नाघेको थियो। तर, यसपटक त्यो जति जोश देखिएन। खेल सुरु हुनु केही मिनेटअघि पनि एक सयभन्दा कम मूल्यमा टिकटहरू पाइरहेको थियो।

तर, स्टेडियमबाहिर भने अझै पनि मेसीको क्रेज स्पष्ट देखिन्थ्यो। बियर लाइन, हट डग लाइन वा बाथरुम लाइन सबै ठाउँमा मेसीको जर्सी र टी-शर्टमा सजिएका समर्थक देखिन्थे।

यो उनको सुवारु पार्कमा दोस्रो खेल थियो। अघिल्लो सिजन उनले यही पार्कमा अर्जेन्टिनाबाट कोपा अमेरिका खेल्न्नुपर्ने थियो। तर, उनले फिलाडेल्फिया यात्रा गरेनन्।

मेसीले आफ्नो नाम घोषणा हुँदा ठूलो ताली र हुटिङ पाए। तर, जब उनले गोल गरे, ‘सन्स अफ बेन’ समर्थक समूह पूरै शान्त भयो। ‘हामीले हाम्रो चरित्र र व्यक्तित्व देखायौं,’ प्रशिक्षक जाभियर मास्केरानोले भने।

पछिल्लो सिजन मियामीले एमएलएस इतिहासकै उत्कृष्ट नियमित सिजन खेलेको थियो। त्यसमा २२ जित, चार हार र आठ बराबरीको नतिजा थियो। तर, यस सिजन त्यस्तो नतिजा दोहर्‍याउन सकेको छैन।

‘हामी केही खराब नतिजाबाट गुज्रिरहेका छौं,’ मेसीले अर्लान्डोसँगको हारपछि एप्पल टिभीसँग भनेका थिए, ‘तर हामीले काम गर्न जारी राख्नुपर्छ र बाँकी खेलमा ध्यान दिनुपर्छ। मे महिनाका बाँकी ३–४ खेल सकेसम्म राम्रोसँग टुंग्याउनुपर्छ। यसपछि क्लब विश्वकपको तयारी गर्नुपर्छ।’

क्लब विश्वकप जुन १४ देखि सुरु हुँदैछ। केही खेल सुपर बाउल विजेता इगल्सको होम ग्राउन्ड लिंकन फाइनान्सियल फिल्डमा हुनेछन्। युनियनका लागि पनि यो रात निराशाजनक भएन। उसको अपराजित यात्रा नौ खेलमा पुगेर टुंगियो। यद्यपि, १५ खेलपछि ३० अंकसहित क्लब इतिहासको सबैभन्दा राम्रो सुरुआत गर्न युनियन सफल भएको छ।

खेलअघि इगल्सका स्टार कर्नरब्याक कूपर डेजिनले ड्रम बजाएर स्टेडियममा उत्सवको सुरुआत गराएका थिए। युनियनका सुलिभान र बारिबोले पहिलो हाफमा गोल गर्दै टिमलाई उत्कृष्ट लयमा राखे। तर, मेसीले सबै योजना उल्टाइदिए। अब मेसी र मियामीको ध्यान क्लब विश्वकपतिर मोडिएको छ।