१८ वर्षपछि आर्सनलले जित्यो महिला च्याम्पियन्स लिग

काठमाडौं। पोर्चुगलको एस्तादियो जोसे अल्भालाडे रंगशालामा शनिबार राति आर्सनलले साबिक विजेता बार्सिलोनामाथि १–० को जित निकाल्दै दोस्रोपटक महिला च्याम्पियन्स लिग उपाधि उचालेको छ।

खेलको ७५औं मिनेटमा बेथ मीडको पासमा स्टिना ब्लाकस्टेनीउसले गरेको गोलले आर्सनललाई ऐतिहासिक जित दिलायो। यो उपाधि आर्सनलले १८ वर्षपछि जितेको हो। आर्सनलले अन्तिमपल्ट सन् २००७ मा उपाधि जितेको थियो।

बार्सिलोना यो उपाधिका लागि मुख्य दाबेदार थियो। उसले पछिल्ला पाँच वर्षमा चौथो उपाधि जित्ने लक्ष्य लिएको थियो। बार्सिलोना लियोनपछि लगातार तीन उपाधि जित्ने इतिहास बनाउने प्रयासमा थियो।

टोली दुई पटकका बलोन डी’ओर विजेता आइताना बोनमाती र एलेक्सिया पुटेलासको नेतृत्व थियो। वोल्फ्सबर्ग र इङ्लिस च्याम्पियन चेल्सीलाई नकआउट चरणमा हराएको बार्सिलोना सानदार लयमा थियो।

तर, आर्सनलले रक्षात्मक शैली अपनाउँदै अधिकांश समय बल नियन्त्रणमा राख्न दिएन। दोस्रो हाफको सुरुवातबाहेक बार्सिलोनाले कुनै उल्लेखनीय मौका बनाउन सकेन।

गोलकिपर काता कोलले फ्रिडा मानुम र ब्लाकस्टेनीउसको दुई सानदार प्रहार रोक्दा खेल बराबरीमा थियो। तर, अन्ततः ब्लाकस्टेनीउसले ७५औं मिनेटमा गोल गर्दै आर्सनललाई जित दिलाइन्।