डाँस मोरङ र काँकडभिट्टाको विजयी सुरुआत
पथरी। डाँस मोरङ क्रिकेट क्लब र बि एन्ड एस क्रिकेट क्लब काँकडभिट्टाले प्रथम कञ्चनजंघा क्रिकेट प्रतियोगितामा विजयी सुरुआत गरेका छन्।
मोरङको पथरी शनिश्चरे–१० स्थित जिरीखिम्ती मैदानमा शनिबारदेखि सुरु भएको प्रतियोगिताको उद्घाटन खेलमा डाँसले स्टन बुलेट क्रिकेट क्लब दुहबीलाई सात विकेटले पराजित गरेको हो।
स्टन बुलेटले प्रस्तुत गरेको ९४ रनको लक्ष्य डाँस मोरङले ११ ओभरमै ३ विकेट गुमाउँदै लक्ष्य पूरा गर्यो। टोलीका रबिन मण्डलले सर्वाधिक ३१ रन बनाए।
दीपेश सुवेदीले २६ र उमर सानीले १६ रन बनाए। स्टन बुलेटका लोकेश पौद्धार, मनिष न्यौपाने र सौर्य रौनियारले समान एक विकेट लिए।
वर्षाले असर गरेपछि खेल दुई ओभर घटाइएको थियो । टस हारेर पहिले ब्याटिङ गरेको स्टन बुलेटले निर्धारित १८ ओभरमा ६ विकेटको क्षतिमा ९४ रनको लक्ष्य प्रस्तुत गर्यो।
बुलेटका लोकेश पौद्धारले २६, अमृत शर्माले २२ र सूर्य रौनियारले १२ रन बनाए। अन्य खेलाडी भने दोहोरो अंक बनाउन सकेनन्।डाँसका मोहम्मद उमर सानीले उत्कृष्ट प्रदर्शन गर्दै पाँच विकेट लिए। रवीन मण्डलले एक विकेट हात पारे।
म्यान अफ द म्याच डाँसकासानी घोषित भए।
बराह क्षेत्र नौ रनले पराजित
प्रतियोगिताको दोस्रो खेलमा काँकडभिट्टाले बराह क्षेत्र क्रिकेट क्लबलाई नौ रनले पराजित गर्दै जित हात पारेको छ।
१०८ रनको लक्ष्य पछ्याएको बराह क्षेत्रले निर्धारित २० ओभरमा ९६ रन मात्र बनाउन सक्यो । टोलीका उमेश चौधरीले सर्वाधिक २२ रन बनाए। आयुष राईले १८ र निक्कु मण्डलले १६ रन बनाए।
काँकडभिट्टाका लागि प्रेम सिंहले तीन विकेट लिए। शिव राजवंशीले दुई विकेट तथा आशिक रानामगर, आयुष न्यौपाने र प्रवेश कामतीले समान एक विकेट लिए।
टस जितेर पहिले ब्याटिङ गरेको काँकडभिट्टाले १४ ओभरमा १०७ रन बनाउँदै अलआउट भयो। समीर श्रेष्ठले सर्वाधिक ३२ रन बनाए। आयुष न्यौपानेले २६ र देवेन्द्र महतले १७ रन बनाए ।
बराह क्षेत्रका निक्कु मण्डलले तीन विकेट। अनीश श्रेष्ठ र आयुष राईले समान दुई विकेट तथा अजय पौद्धार र उमेश चौधरीले समान एक विकेट लिए।
म्यान अफ द म्याच आयुष न्यौपाने घोषित भए। त्यसअघि पथरीशनिश्चरे नगर उपप्रमुख देवीमाया काफ्लेले उद्घाटन गरेकी थिइन्। कन्चनजंघा दैविक प्रकोप व्यवस्थापन समितिको आयोजनामा सुरु भएको प्रतियोगिमा झापा, मोरङ र सुनसरीका १६ क्रिकेट क्लबको सहभागिता रहेको छ।
