सनले नै ‘स्टेज’मा पाएनन् मेडल !

काठमाडौं। टोटनह्यामले १६ वर्षपछि कुनै मुख्य उपाधि उचालेको ऐतिहासिक रातमा एउटा अचम्मको दृश्य देखियो। त्यो थियो– युरोपा लिग च्याम्पियन टोलीका कप्तान तथा स्टार स्ट्राइकर सन ह्युङ–मिनसहित केही खेलाडीलाई मेडल नपुग्नु !

युरोपेली फुटबल महासंघ (युइएफए) का अध्यक्ष एलेक्जेन्डर चेफेरिनले मञ्चमै मेडल वितरण गरेका थिए। तर, वितरण गर्दागर्दै मेडल सकिएपछि उनी पनि केही क्षणका लागि छक्क परेका देखिन्थे।

टोटनह्यामले म्यानचेस्टर युनाइटेडलाई १–० ले पराजित गर्दै उपाधि जितेको सो खेलको समापन समारोहमा यस्तो घटनाले उत्सवमा केही हल्का निराशा थपिएको थियो।

युइएफएका अनुसार समारोहमा प्रत्येक क्लबलाई ३० वटा मात्र मेडल स्टेजमै वितरण गरिने जानकारी पहिले नै दिइएको थियो। बाँकी २० मेडल क्लबलाई पछि दिइनेव्यवस्था गरिएको थियो। यी २० मेडल बाढ्ने जिम्मेवारी क्लबकै थियो। ती मेडल खेलाडी वा स्टाफलाई आन्तरिक रूपमा वितरण गर्नुपर्ने हो।

तर, टोटनह्यामले स्टेजमा ३० जनाभन्दा बढीलाई पठाउँदा मेडल कम पर्न गएको युइएफएले स्पष्ट पारेको छ। यद्यपि, कप्तान सनले टोलीसामु ट्रफी उचाल्ने अवसर पाए। तर, मेडल भने मैदानमै प्राप्त गर्न सकेनन्। पछि उनलाई क्लबमार्फत मेडल दिइने छ भन्ने अनुमान गरिएको छ।

यो जितसँगै सन् २००८ पछि टोटनह्याम  पहिलोपटक कुनै ठूला उपाधि जित्न सफल भएको हो। यसले क्लबको नयाँ युग सुरु भएको संकेत गरेको छ। मेडलको सानो झमेला भए पनि टोटनह्याम समर्थकका लागि यो साँझ ऐतिहासिक रह्यो।