भिनिसियसको डकुमेन्ट्री विवादमा

काठमाडौं। ब्राजिली फरवार्ड भिनिसियस जुनियरबारे बनेको नयाँ नेटफ्लिक्स डकुमेन्ट्रीमा भएको दाबीलाई लिएर स्पेनको फुटबल क्लब भ्यालेन्सियाले कानुनी कारबाहीको चेतावनी दिएको छ। 

क्लबले दुई वर्षअघि आफ्नै घरेलु मैदान मेस्टाया स्टेडियममा भिनिसियसमाथि भएको जातीय दुर्व्यवहारको घटनालाई डकुमेन्ट्रीले ‘गलत ढंगले प्रस्तुत गरेको’ भन्दै आपत्ति जनाएको हो।

भ्यालेन्सियाका अनुसार डकुमेन्ट्रीमा ठूलो संख्यामा क्लब समर्थकले भिनिसियसमाथि जातीय टिप्पणी गरेको देखाइएको छ, जुन वास्तविकताभन्दा फरक छ। क्लबले डकुमेन्ट्री निर्माण कम्पनीसँग तुरुन्त लिखित रूपमा यो गलत कुरा सच्याउन माग गरेको छ।

भिनिसियसका प्रतिनिधिले मंगलबार यो विवाद नेटफ्लिक्स र डकुमेन्ट्री निर्माण कम्पनीसँग भएको स्पष्ट पारेको छ। यसमा भिनिसियसको कुनै संलग्नता नरहेको उसको दाबी छ।

डकुमेन्ट्रीमा सामाजिक सञ्जालबाट लिइएको एउटा भिडियो समावेश छ। उक्त भिडियोमा मेस्टाया स्टेडियममा समर्थकहरूको ठूलो समूह चिच्याइरहेको देखिन्छ। भिडियोलाई ‘मोनो’ (स्पेनी भाषामा बाँदर) भनेर सबटाइटल दिइएको छ। तर, भ्यालेन्सियाको दाबीमा समर्थकहरू वास्तवमा ‘टोन्टो’ (स्पेनी भाषामा मूर्ख) भनेर चिच्याइरहेका थिए।

क्लबले एक्स (ट्विटर) मा विज्ञप्तिमा लेखेको छ,‘भ्यालेन्सिया समर्थकहरूमाथि लगाइएका अन्यायपूर्ण र झूटा आरोपका कारण क्लबले मेस्टायामा भएको घटनालाई लिएर डकुमेन्ट्री निर्माण कम्पनीसँग तुरुन्त लिखित माग गरेको छ। सत्य र हाम्रा समर्थकप्रतिको सम्मान कायम हुनुपर्छ। क्लबसँग कानुनी कारबाही गर्ने अधिकार सुरक्षित छ।’

यद्यपि, सन् २०२३ मा भएको सो खेलमा भिनिसियसमाथि जातीय दुर्व्यवहार गर्ने केही समर्थक पक्राउ परेका थिए। तीन जना समर्थक जातीय दुर्व्यवहारमा दोषी ठहर भएका थिए। उनीहरूलाई आठ महिनाको जेल सजाय सुनाइएको थियो।

अदालतमा उनीहरूको मुद्दा चल्दाको क्रममा उक्त भिडियो देखाइएको थियो। उक्त भिडियो वास्तविकतासँग मेल खाँदैन भन्ने प्रमाणको रूपमा पेश गरिएको थियो।

उक्त खेलको क्रममा भिनिसियस भावुक हुँदै रोएका थिए। सुरुमा उनले खेल जारी राख्न चाहेका थिएनन्, तर पछि मैदान फर्किएर जातीय विभेदविरुद्ध लडिरहने संकल्प व्यक्त गरेका थिए।

त्यसबेला रियल मड्रिडका प्रशिक्षक कार्लो एन्सेलोटीले भ्यालेन्सिया समर्थकहरूले भिनिसियसमाथि जातीय दुर्व्यवहार गरेको भन्दै आरोप लगाएका थिए। यद्यपि, पछि उनले माफी माग्दै भनेका थिए– पूरै रंगशालामा उपस्थित समर्थक होइनन्, केही हुन्।