काठमाडौं। इत्तिहाद रंगशालाको ठूला पर्दामा ‘ट्रिब्युट’ भिडियो देखाइरहँदा म्यानचेस्टर सिटीका मिडफिल्डर केभिन डि ब्रुएना आँसु झार्दै दर्शकहरूलाई सम्बोधन गरिरहेका थिए।
योसँगै उनले सिटीमा एक दशक लामो व्यवसायिक खेल करियरबाट विश्राम लिएका छन्। उनको लामो योगदानको कदर गर्दै बोर्नमाउथविरुद्धको खेल सकिएपछि टिमका साथीहरूबाट ‘गार्ड अफ अनर’ प्राप्त गरेका थिए। सिटीले पनि रंगशालाबाहिर उनको सम्मानमा शालिक निर्माण गर्ने घोषणा गरेको छ।
‘यसको अर्थ म सधैं यो क्लबको हिस्सा रहनेछु। म जब आफ्ना परिवार र साथीहरूसँग यहाँ फर्कन्छु, म आफैंलाई यहाँ देख्न सक्नेछु। त्यसैले म यहाँ सधैं रहनेछु,’ उनले भने।
सिटीले आफ्नो एकेडेमीमा डि ब्रुएनाको मोजाइक पनि सार्वजनिक गरेको छ। क्लब क्याम्पसमा रहेको एउटा सडकलाई उनको नाम दिइएको छ। ३३ वर्षीय डि ब्रुएना सिटीको सफलताको ऐतिहासिक युगका हिस्सा रहे। यो बीचमा क्लबले १६ वटा प्रमुख उपाधि जित्यो। जसमा ६ प्रिमियर लिग र च्याम्पियन्स लिग पनि समावेश छन्।
खेलको दोस्रो हाफमा मैदानबाट निस्किँदा उनले दर्शकहरूलाई हात हल्लाएर बिदा मागे। सिटीका समर्थकहरूले उनलाई भावुक स्वरमा सम्मान व्यक्त गर्दै गीत गाए। त्यसपछि उनले टचलाइनमा पुगेर प्रशिक्षक पेप ग्वार्डिओलालाई अँगालो हाले।
‘कसैकसै खेलाडीहरू अनौठो हुन्छन्। १० वर्षको समयमा अनगिन्ती खेल, उपाधि र अविस्मरणीय पलहरू थिए। आजको दिनले उनलाई कति माया गरिएको छ भन्ने कुरा प्रस्ट देखायो,’ ग्वार्डिओलाले भने।
सिटीबाट सम्मानस्वरूप म्युरल (भित्तेचित्र) पाउने उनी पछिल्लो खेलाडी बनेका छन्। यसअघि याया टुरे, जो हार्ट, डेभिड सिल्भा, भिन्सेन्ट कम्पनी, सर्जियो अगुएरो, फर्नान्डिन्हो र इल्के गुन्डोगानले पनि यो सम्मान पाइसकेका छन्।
