सात वर्षको प्रतीक्षापछि ह्याम्बर्गर बुन्डेसलिगा फर्कियो

काठमाडौं। सात वर्षको प्रतीक्षापछि ह्याम्बर्गर एसभी अन्ततः बुन्डेसलिगा फर्किएको छ। शनिबार जर्मनीको दोस्रो डिभिजनको खेलमा उल्मलाई ६–१ ले हराउँदै ह्याम्बर्गले स्वतः पदोन्नति सुनिश्चित गरेको हो।

यो जितसँगै ह्याम्बर्गले तेस्रो स्थानमा रहेको एल्भर्सबर्गभन्दा चार अंकले अगाडि रहँदै शीर्ष दुईमा आफ्नो स्थान पक्का गर्‍यो। लिगमा अब एक खेल मात्र बाँकी छ।

‘हामी फर्कियौं!’ अन्तरिम प्रशिक्षक मर्लिन पोल्जिनले भने। पोल्जिन जन्मजात ह्याम्बर्ग निवासी हुन् र नोभेम्बरमा स्टेफन बाउमगार्ट बर्खास्त भएपछि जिम्मेवारी सम्हालेका थिए। अब उनलाई पहिलो डिभिजनका लागि स्थायी अनुबन्ध दिने पुष्टि गरिएको छ।

‘तपाईंले धेरै मिहिनेत गर्नुहुन्छ र त्यसको पुरस्कार पाउनुहुन्छ भने त्यो क्षण कहिल्यै बिर्सन सकिन्न,’ ३४ वर्षीय पोल्जिनले भने।

ह्याम्बर्ग बुन्डेसलिगाको स्थायी सदस्य थियो। सन् १९६३ मा लिग स्थापना भएकोदेखि निरन्तर खेल्दै आएको एकमात्र क्लब थियो। त्यसैले यसलाई डेर डिनो (डाइनोसर) को उपनाम दिइएको थियो। तर, सन् २०१८ मा क्लब रेलिगेट भयो।

त्यसयता ह्याम्बर्ग हरेक सिजन बुन्डेसलिगानजिक पुगेर अन्त्यमा निराश हुनुपरेको थियो। पहिलो तीन सिजन लगातार चौथो स्थानमा रह्यो। त्यसपछि दुई पटक तेस्रो भयो तर प्लेअफमा बुन्डेसलिगाको तल्लो तेस्रो टिमसँग पराजित भयो। गत सिजन पुनः चौथो स्थानमा सीमित भयो।

शनिबारको खेलमा जित हासिल गरे मात्र स्वतः पदोन्नति सम्भव हुने भएकाले हजारौं समर्थक खेल सुरु हुनुभन्दा अघि टिम बसलाई स्वागत गर्न आएका थिए।