काठमाडौं। ह्यारी केन मुस्काउँदै थिए। हातमा बियरको गिलास र वरिपरि उनका हर्षित साथीहरू पनि थिए।
म्युनिखको रेस्टुरेन्टको कुनामा उनले ‘विइ आर द च्याम्पियन’ गाउन थाले। सायद उनले त्यो गीत मनमनै धेरैपल्ट गाएका थिए। तर, आज पहिलोपल्ट त्यो गीत साँच्चै उनीमाथि लागू भयो। किनकि अब उनी साँच्चै च्याम्पियन हुन्।
आइतबार केनको करिअरको सबैभन्दा लामो र पीडादायी अध्यायको अन्त्य भयो। बायर्न म्युनिखले बुन्डेसलिगाको उपाधि जितेपछि उनको उपाधिविहीन यात्रा समाप्त भयो।
सँगै बिलिन भयो उनको टाउकोमा झुन्डिरहेको ‘कर्स’को बादल। जुन उनलाई ‘उपाधिविहीन जिनियस’को प्रतीक बनाउँदै आइरहेको थियो।
३१ वर्षीय केन इङ्ल्यान्डका सबैभन्दा उत्कृष्ट स्ट्राइकरमध्ये एक हुन्। तर, उपाधिको हकमा उनी सधैं खाली हात रहँदै आए। इङ्लिस प्रिमियर लिग क्लब टोटेनह्यामबाट उनले खेल्दा यत्तिकै पटक फाइनल गुमाए।
इङ्ल्यान्डको जर्सीमा सन् २०१८ विश्वकप र २०२१ युरोकपमा नजिकै पुगेर चुक्न पुगे। उनले जुनसुकै रंगशालामा गोल गरे पनि हातमा ट्रफी कहिल्यै परेन।
यो श्रृङ्खला टुटाउन उनी सन् २०२३ मा बायर्न पुगेका हुन्। त्यो पनि क्लबको इतिहासकै कीर्तिमानी रकममा। तर, विडम्बना उनी पुगेको पहिलो सिजनमा नै बायर्नले दशकयताको पहिलो उपाधिविहीन वर्ष भोग्नुपर्यो। आलोचकहरू फेरि भन्न थाले– केनको कर्स त बायर्नमा पनि सरेछ!
तर, आइतबार यो कथा उल्टियो। बायर्न मैदानमा थिएन। फ्राइबर्गले बायर लेभरकुजेनलाई २–२ को बराबरीमा रोक्दै बायर्नलाई दुई खेल बाँकी रहँदै आठ अंकको स्पष्ट अग्रता दिलायो। अन्ततः बायर्न च्याम्पियन बन्यो।
उपाधिको खबर आयलगत्तै म्युनिखको एक प्राइभेट पार्टीमा केनले साथी जोशुआ किम्मिचसँग मिलेर बब मार्लीको ‘थ्री लिटिल बर्ड्स’ गाए। ‘डन्ट वोरी एबाउट अ थिङ्’। यो गीत उनको कथा जस्तै सुनिन्थ्यो– ढिलो भयो, तर अन्ततः सब ठिक भयो।
शुक्रबारको खेलमा बायर्नले लाइपजिगसँग ३–२ ले अग्रता लिए पनि अन्तिम मिनेटमा बराबरी गोल खाँदा उपाधि घोषणाको समारोह रोकिएको थियो। थोमस मुलरले त्यसपछि इन्स्टाग्राममा लेखे– ‘अर्को हप्ता, ह्यारी!’ तर, केनलाई अब कुर्नु पर्दैन। आइतबार फ्राइबर्गको मैदानमै उनको सपनाको ढोका खुलिसकेको छ।
बायर्नको यो ३४औं बुन्डेसलिगा उपाधि हो। सन् १९३२ मा पहिलोपल्ट जितेको उपाधिपछि यो लिग इतिहासमै कीर्तिमानी उपलब्धि हो। यही उपाधिसँगै क्लबका ‘लेजेन्ड’ मुलर पनि बिदा हुँदैछन्।
यो उनको १३औं बुन्डेसलिगा उपाधि हो। एक खेलाडीको लागि यो अकल्पनीय उपाधि संख्या भन्दा फरक पर्दैन।
प्रशिक्षक युलियन नागेल्सम्यान भन्छन्,‘मुलर अब एक लेजेन्डका रूपमा क्लबबाट बिदा हुँदैछन्। तर, आजको क्षण केनको लागि बनाइएको हो।’
ह्यारी केनका लागि यो उपाधि केवल ट्रफी होइन, आत्मविश्वासको पुनर्जन्म हो। एक दशकभन्दा बढी ‘प्रायः असफल’को छायाँमा रहेका उनले अन्ततः जितको स्वाद चाखे।
