काठमाडौं। रियल मड्रिडका प्रशिक्षक कार्लो एन्सेलोटीले ब्राजिल फुटबल महासंघ (सिबिएफ) सँग करिब करार गरिसकेको र लन्डनमा अन्तिम सम्झौताका लागि समेत पुगेको बताइएको थियो। तर, कुरा फाइनल हुन सकेन।
इटालियन प्रशिक्षकको सम्झौता भंग हुनुको मुख्य कारण मड्रिडसँगको करारलाई मानिएको छ। एन्सेलोटीले क्लब विश्वकपअघि नै ब्राजिल जाँदैछन् भन्ने बुझिएको थियो।
तर, मड्रिडले उनलाई क्लबबाट बिदा लिन स्पष्ट सर्त राखेको थियो। त्यो थियो– एन्सेलोटीले क्लबबाट प्राप्त गर्न बाँकी ११ मिलियन युरो (९.४ मिलियन पाउन्ड) तलब त्याग्नुपर्ने। जसलाई उनले अस्वीकार गरे।
अब ब्राजिलले अर्को प्रशिक्षकको खोजी सुरु गरिसकेको छ। ब्राजिलले साउदी क्लब अल हिलालका प्रशिक्षक जोर्ज जिससलाई मुख्य दाबेदारका रूपमा अगाडि सारेको छ।
क्लब विश्वकपअघि नै मड्रिडले एन्सेलोटी छोड्न तयार रहेको थियो। तर, मड्रिड कुनै पनि प्रकारको क्षतिपूर्ति रकम तिर्न तयार देखिएको छैन।
