५० वर्षमा एकपटक मात्र जन्मिने प्रतिभा यमल !

काठमाडौं। इन्टर मिलानका प्रशिक्षक सिमोने इन्जाघीले लामिन यमलको प्रदर्शन देखेपछि भने,‘यस्ता प्रतिभा ५० वर्षमा एकपटक मात्र जन्मिन्छन्।’

च्याम्पियन्स लिगको सेमिफाइनलको पहिलो लेगमा बार्सिलोनासँग ३–३ को रोमाञ्चक बराबरी खेलपछि उनले १७ वर्षीय बार्सिलोनाका खेलाडीको प्रशंसा गरेका हुन्। ‘मैले उनलाई पहिले कहिल्यै प्रत्यक्ष देखेको थिइनँ, तर आज साँच्चै प्रभावित भएँ,’ इन्जाघीले भने, ‘पहिलो हाफको अन्तिम २५ मिनेटमा उनले हाम्रा लागि ठूलो समस्या खडा गरे।’

बार्सिलोनाका प्रशिक्षक हान्सी फ्लिकले यमललाई प्रतिभाशाली खेलाडी मान्छन्। उनले क्लबका लागि खेलेको १००औं खेलमा देखाएको प्रदर्शनलाई समेत फ्लिक खुलेर तारिफ गर्न पछि परेनन्। ‘उनी एक जिनियस हो भनेर मैले पहिल्यै भनेको छु,’ फ्लिकले भने, ‘ठूला खेलहरूमा उनी चम्किन्छन्। मलाई खुसी लाग्छ ५० वर्षमा एकपल्ट आउने खेलाडी बार्सिलोनामा अहिल्यै आएको छ।’

इन्टरविरुद्धको खेलअघि पत्रकार सम्मेलनमा यमलले आफूलाई अर्जेन्टिनी कप्तान तथा बार्सिलोनाका पूर्वस्टार लिओनल मेसीसँग तुलना नगर्न आग्रह गरेका थिए। तापनि मैदानमा उनले देखाएको प्रदर्शनले मेसीलाई सम्झायो। दायाँ भागबाट बल लिएर अघि बढ्ने, पास दिने र डिफेन्डरहरूलाई छलाउने उनको शैली दर्शनीय रह्यो।

उनले गरेको गोल भने ‘युट्युब कम्पाइलेसन’को लागि योग्य थियो। इन्टरले मार्कस थुराम र डेन्जेल डुम्फ्रिजको गोलमा २–० को अग्रता लिएको थियो। तर, २४औं मिनेटमा यमलले एक डिफेन्डरलाई छलाउँदै चुनौतीलाई पार गरे। बललाई आफ्नो बायाँ खुट्टामा राखे र अर्को दुई डिफेन्डरको अगाडि कर्ल गर्दै गरेको प्रहार पोस्टमा लागेर गोल भयो।

उनी १७ वर्ष २९१ दिनको उमेरमा च्याम्पियन्स लिग सेमिफाइनलमा गोल गर्ने सबैभन्दा कान्छा खेलाडी बने। केही बेरपछि उनले फेरि दुई डिफेन्डर छलाउँदै प्रहार गरे, जुन बल क्रसबारमा लागेर फर्कियो। ‘यो केटा अविश्वसनीय छ,’ म्यानचेस्टर सिटीका स्ट्राइकर एर्लिङ हालान्डले स्न्यापच्याटमा लेखे।

त्यसपछि यमलले फेरान टोरेस र डानी ओल्मोलाई पास दिए, जसको प्रहार इन्टरका गोलकिपर यान सोमरले रोके। त्यसपछि राफिन्हाले हेडरमार्फत टोरेसलाई पास दिए र उनले गोल गर्दै स्कोर २–२ बनाए।

डुम्फ्रिजले इन्टरलाई फेरि अग्रता दिलाए पनि राफिन्हाको लामो दूरीको प्रहार गोल भएपछि खेल ३–३ मा टुंगियो। तर, यमल भने अन्तिम समयमा विजयी गोल नआएकोमा अलि निराश देखिए।

‘सारा संसारले देख्न सक्छ, ऊ कति उत्कृष्ट खेलाडी हो,’ इन्टरका मिडफिल्डर हेनरिक म्खितार्यानले भने, ‘हामीले उसलाई रोक्न खोज्यौं, तर, त्यो धेरै गाह्रो भयो। आशा छ अर्को साता उसलाई यति धेरै खेल्न दिने छैनौं।’

खेलपछि यमालले सबैको प्रशंसा सुन्दा खुसी लागेको प्रतिकृया दिए।, तर, उनी दोस्रो लेगमा केन्द्रित छन्। ‘सबैको प्रशंसा सुन्दा खुसी लागेको छ। तर, म अब दोस्रो लेगमा केन्द्रित छु। हामीले यो खेल जित्न सक्थ्यौं भन्ने थाहा थियो, अब हाम्रो ध्यान दोस्रो खेलमा जितेर फाइनल पुग्नेमा छ,’ उनले भने।

बार्सिलोना सन् २०१५ पछि पहिलोपटक च्याम्पियन्स लिगको फाइनलमा पुग्ने प्रयासमा छ। इन्टरले सन् २०१० मा बार्सिलोनालाई हराएर अन्तिमपटक उपाधि जितेको थियो। फाइनल खेल मे ३१ मा म्युनिखमा हुनेछ।