वाटा अन्तर्राष्ट्रिय तेक्वान्दोमा नेपाललाई दुई स्वर्ण

काठमाडौं। जापानको ओसाकामा आयोजना भएको २१औं वाटा अन्तर्राष्ट्रिय तेक्वान्दो च्याम्पियनसिपमा नेपालले दुई स्वर्ण पदक जितेको छ।

आइतबार सम्पन्न प्रतियोगितामा नेपालका योगेशकुमार योगी र इन्जुमा राईले स्वर्ण पदक जितेका हुन्। च्याम्पियनसिपमा नेपालले तीन रजत र ६ कांस्य पदक पनि जित्यो। च्याम्पियनसिपमा योगेशले  पुरुष १८ वर्षमाथिको पुम्से र इन्जुमाले महिला ५७ केजीमुनि तौल समूहमा स्वर्ण पदक जितेका हुन्। 

यसैगरी सिनियर पुरुष ६८ केजीमुनि तौल समूहमा विमल रोकाय, १२ देखि १४ वर्ष उमेर समूहको महिला पुम्सेमा खुसी गौतम र सिनियर महिला पुम्सेमा मलिका घुलुले रजत पदक जिते।

यस्तै महिला ४२ केजीमुनि डोल्मा लामा, पुरुष ७४ केजीमुनि चन्द्रप्रसाद गौतम, ५४ केजीमुनि अंकित गौतम र जुनियर ग्योरोगीको पुरुष ३३ केजीमुनि वीरेन्द्र हुमागाईंले कांस्य पदक जिते। यस्तै ग्योरोगीको महिला २९ केजीमुनि र १२ देखि १४ वर्ष उमेर समूहको एकल पुम्सेमा खुसी जोशीले दोहोरो कांस्य पदक जितिन्। 

नेपाली टोली प्रह्लाद थापाको नेतृत्वमा ओसाका आएको हो। टिम व्यवस्थापकमा गंगाप्रसाद गौतम र प्रदीप थापा रहेका छन्। अन्तर्राष्ट्रिय निर्णायकद्वय टीकाप्रसाद लिम्बू र बब्लु सिवाकोटीले प्रतियोगितामा निर्णायकको भूमिका निर्वाह गरेका थिए।