काठमाडौं। नेपाल सुपरलिग (एनएसएल) को तेस्रो संस्करण अन्त्यको संघारमा आइपुगेको छ, जसको उपाधि होडमा डिफेन्डिङ च्याम्पियन ललितपुर सिटी एफसीले पोखरा थन्डर्सविरुद्ध शनिबार दशरथ रंगशालामा प्रतिस्पर्धा गर्दैछन्।
दशरथ रंगशालामा दर्शक पातलिँदै गएपनि खेलको रौनक घटेको छैन। तर, मैदानबाहिर पनि एनएसएलमा उत्तिकै चलखेल भएको पाइएको छ। विशेषतः सट्टेबाजी (बेटिङ) मा। बेटिङलाई नेपालको कानूनले अवैध भनेको छ। र, कानूनअनुसार देशभित्र हुने कुनैपनि प्रतियोगितामा बेटिङ गर्नु, गराउनूमात्रै होइन, बेटिङ कम्पनीमा सूचिकृत गर्नु पनि गैरकानूनी कार्य हो।
देशको कानूनले अवैध भन्दाभन्दै पनि एनएसएल तेस्रो सिजनका खेलहरू बेटिङ कम्पनीमा सूचिकृत भएको पाइएको छ। गुगल सर्च गरेमात्रै पनि बेट ३६५, स्पोर्ट्सबेट, वानएक्सबेट, मेलबेट, २२बेट्स१, वानएक्सलाइटलगायतका थुप्रै बेटिङ कम्पनीमा एनएसएल छ्याप्छ्याप्ती भेटिन्छ। तर, ती वेवसाइटहरू नेपालबाट भने खुल्दैनन्। नेपालबाहिरबाट भने नियमित खुलिरहेको बताइएको छ।
नतिजा पनि बेटिङ विश्लेषणअनुसार नै आइरहेको छ। लिग चरणको अन्तिम खेलमा धनगढी एफपसीविरुद्ध एफसी चितवनलाई बेटिङमा बलियो देखाएको थियो, नतिजा त्यस्तै भयो। क्वालिफायर २ मा धनगढीविरुद्ध पोखरा थन्डर्सलाई बलियो देखापएको थियो, नतिजा फेरि उस्तै आयो।
नेपालकै पहिलो अर्बपति (अमेरिकी डलर) नेतृत्वको व्यवसायिक घराना चौधरी ग्रुपनिटकट कम्पनी नेपाल स्पोर्ट्स एन्ड इभेन्ट्स म्यानेजमेन्ट (एनएसईएम) ले अखिल नेपाल फुटबल संघ (एन्फा) सँग ६ वर्षअघि सम्झौता गर्दै एनएसएल आयोजना थालेको थियो। यसवीच बल्ल तेस्रो संस्करण हुँदैछ। र, यो रंगशालामै सीमित छैन, बेटिङको दुनियाँमा पनि खुलेआम चलिरहेको छ।
हुन त एनएसईएमले दोस्रो संस्करणमा बेटिङ कम्पनी वानएक्सबेटलाई औपचारिक रुपमै प्रायोजक बनाएको थियो। तर, यसबारे उकेराडटकमले समाचार प्रकासित गरेपछि वानएक्सबेटलाई एनएसएलले बोर्डलगायत देखिने सबै स्थानबाट हटाएको थियो। यसपालि बेटिङ कम्पनी रंगशालाभित्र नदेखिएपनि एनएसएल बेटिङ प्ल्याटफर्ममा खुलेआम चलिरहेको छ।
-1746105523.JPG)
