रियलसँग बार्सिलोनाको सात अंकको अग्रता

काठमाडौं। डानी ओल्मोले दोस्रो हाफको सुरुआतमै गरेको गोलसँगै बार्सिलोनाले मंगलबार मालोर्कालाई १–० ले पराजित गरेको छ। योसँगै बार्सिलोनाले स्पेनिस ला लिगाको शीर्ष स्थानमा आफ्नो अग्रता बढाएको छ।

मोन्टजुइक स्टेडियममा भएको यो जितपछि क्याटालान क्लब बार्सिलोना अब रियल मड्रिडभन्दा सात अंकले अघि पुगेको छ। रियलले बुधबार गेटाफेसँग खेल्नेछ। बार्सिलोना सन् २०२३ यता पहिलोपटक लिग उपाधि जित्ने लक्ष्यमा छ र अब पाँच खेल बाँकी छन्।

ओल्मोले खेलको दोस्रो हाफ सुरु भएको एक मिनेटमै पेनाल्टी क्षेत्रभित्रबाट निर्णायक गोल गरेका थिए। यो बार्सिलोनाको ला लिगामा लगातार तेस्रो जित हो। बार्सिलोनाले कुल ४० प्रहार गरेको थियो। मालोर्काले जम्मा चार प्रहार गरे पनि लक्ष्यमा थिएन।

‘हामीले धेरै अवसर सिर्जना गर्यौं तर ती अवसरलाई सदुपयोग गर्न सकिएन,’ बार्सिलोनाका मिडफिल्डर गाभीले भने,‘फुटबलमा सधैं सजिलोसँग गोल गर्न पाइँदैन। तर, हामीले प्रयास गरिरह्यौं र अन्ततः सफल भयौं, त्यही महत्त्वपूर्ण हो।’

मालोर्का ले पछिल्ला नौ खेलमा केवल दुईवटा जित हात पारेको छ र टोली सातौं स्थानमा यथावत् छ। बार्सिलोना र रियल यस शनिबार सेभियामा कोपा डेल रेको फाइनलमा आमनेसामने हुनेछन्।

बार्सिलोनाका प्रशिक्षक हान्सी फ्लिकले टोलीमा केही परिवर्तन गरेका थिए। अन्सु फाती करिब ६ महिनापछि पहिलोपटक लिगमा सुरुआती खेलाडीको रूपमा मैदान उत्रिएका थिए। स्ट्राइकर रोबर्ट लेवान्डोस्की मांसपेशीको चोटका कारण अनुपस्थित थिए।

‘हामीले उत्कृष्ट खेल्यौं। खेलाडीहरूको प्रदर्शन देखेर खुसी लाग्यो,’ गाभीले भने।