गोर्खाली रग्बीलाई उपाधि
काठमाडौं। गोर्खाली रग्बी क्लब पाँचौ संस्करणको फिफ्टिन्स रग्बी च्याम्पियनसिपको विजेता बन्न सफल भएको छ।
मंगलबार भएको लिगको अन्तिम दिनको खेलमा नेपाल पुलिस क्लबलाई ५५–० ले पराजित गर्दै गोर्खाली रग्बीले उपाधि रक्षा गरेको हो। जितसँगै गोर्खालीले लिगको तीन वटै खेल जित्दै लिग तालिकाको शीर्ष स्थानमा उक्लिएको थियो।
अर्को खेलमा त्रिभुवन आर्मी क्लबले नेपाल एपीएफ क्लबलाई एक संघर्षपूर्ण खेलमा १९–७ ले पराजित गर्दै उपविजेता बन्न सफल भयो। गत वर्षको उपविजेता एपीएफ भने तेस्रो स्थानमा सीमित भयो। नेपाल पुलिस क्लबले भने प्रतियोगितामा अंक बटुल्न सकेन।
विजेता गोर्खाली रग्बीले नगद २ लाख २२ हजार २२२ रुपैयाँ प्राप्त गरे भने उपविजेता एपीएफले १ लाख ११ हजार १११ रुपैयाँ हात पार्यो। प्रतियोगिताको सर्वोकृष्ट खेलाडी गोर्खाली रग्बी क्लबका विजय खड्का घोषित भए। उनले १५ हजार प्राप्त गरे।
प्रतियोगिताको कठिन मानिएको दुई खेलमा एपीएफ र त्रिभुवन आर्मीलाई पराजित गरिसकेको गोर्खाली रग्बी क्लबका लागि खेल तुलनात्मक रूपमा सहज बन्न पुग्यो। एकपक्षीय खेलमा गोर्खालीले पहिलो हाफमा ४०–० को अग्रता लिइसकेको थियो।
गोर्खालीले पहिलो सेटमै वैकल्पिक खेलाडी राखेर मैदानमा उत्रिएको थियो। पहिलो पटक फिफ्टिन्स खेलिरहेको नेपाल पुलिस क्लबसँगको खेल सहज हुने अनुमान गरिएजस्तै नै खेलमा गोर्खाली सुरुआतदेखि नै हाबी हुन पुग्यो। दोस्रो हाफमा भने टोलीले १५ अंक थपेको थियो।
नेपाल पुलिसले कुनै स्कोर जोड्न सकेन। त्रिभुवन आर्मी र एपीएफबीचको खेल भने निकै प्रतिस्पर्धात्मक बनेको थियो। एपीएफले सुरुआतमा एक ट्राई र कन्भर्जनलाई सफल पारेर ७ अंक जोडेको थियो। सेनाले ५ अंक जोडेपछि पहिलो हाफ ७–५ को प्रतिस्पर्धात्मक स्थितिमा पुगेको थियो।
तर, दोस्रो हाफमा सेना खेलमा फर्कियो। दोस्रो हाफको सुरुआतमा लगातार सात अंक जोडेपछि आर्मीले खेलमा अग्रता बनायो र त्यसलाई अन्तिम समयसम्म कायम राख्यो। एपीएफले खेलमा फर्किने प्रयास सफल भएन। बरु खेल सकिनै लाग्दा आर्मीले अर्को एउटा ट्राई गरेर खेल १९–७ ले जित्न सफल भयो।
नेपाल रग्बी संघको आयोजनामा राउन्ड रोविन लिगको आधारमा सञ्चालन भएको खेलमा ३ विभागीय र गोर्खाली रग्बी गरी चार टोलीको सहभागिता रहेको थियो। यो प्रतियोगिताबाट दुई महिनापछि नेपाल र बंगलादेशबीच काठमाडौंमा हुने फिफ्टिन्स रग्बी श्रृंखलाको लागि खेलाडी छनोट गरिने नेपाल रग्बी संघले जनाएको छ।
