काठमाडौं। नेपाल सुपर लिग (एनएसएल) को लिग चरणका खेल अन्तिमतिर पुग्दा पछिल्लो संस्करणका फाइनलिस्ट एक खेलअगाबै ‘सेफ साइड’मा पुगेका छन्।
त्रिपुरेश्वरस्थित दशरथ रंगशालामा जारी प्रतियोगिताको आफ्नो पाँचौं खेलमा साबिक विजेता ललितपुर सिटी एफसीले प्रतियोगिताकै कमजोर टोली बुटवल लुम्बिनी एफसीलाई २–० ले पराजित गर्दै प्लेअफमा स्थान बनाएको थियो।
तर, तत्कालीन अवस्थामा अंक तालिकाको दोस्रो स्थानमा रहेको एफसी चितवनले पछ्याइरहेको अवस्थामा ललितपुरले कुन क्वालिफायर खेल्ने अझैं टुंगो लागिसकेको थिएन। तर, सोमबार धनगढीसँग चितवनले अप्रत्याशित २–० को हार बेहोरेसँगै ललितपुरले पहिलो क्वालिफायर खेल्ने पक्का भएको हो।
जारी प्रतियोगितामा चितवनको यो पहिलो हार हो। यस्तै, ललितपुर र धनगढीले भने पाँच खेलको समाप्तिमा आफ्नो अपराजित यात्रा कायम राख्न सफल भएका छन्। ललितपुर पहिलोपल्ट पहिलो क्वालिफायरमै पुग्न सफल भएको हो।
ललितपुरले यसअघिका दुवै संस्करणमा दोस्रो क्वालिफायर खेलेको थियो। पहिलो संस्करणमा ललितपुरले बुटवललाई १–० हराए पनि इलिमिनेटरमा काठमाडौं रेजर्ससँग ३–० को फराकिलो हार बेहोर्दै तेस्रो स्थानमा चित्त बुझाएको थियो।
दोस्रो संस्करणमा भने दोस्रो क्वालिफायरमा सोही नतिजा उल्टाउँदै इलिमिनेटरमा स्थान पक्का गर्न सफल भएको थियो। इलिमिनेटरमा पोखरा थन्डर्सलाई २–१ ले पराजित गर्दै फाइनल पुगेको ललितपुरले धनगढीलाई माथ खुवाउँदै उपाधि नै आफ्नो पोल्टामा पारेको हो।
ललितपुरसँगै समान ११ अंक रहेको धनगढी पनि यस संस्करण ‘सेफ साइड’मा पुगिसकेको छ। सात अंक बोकेको चितवनलाई उछिन्दै शीर्ष स्थानमा पुगेको धनगढीले लगातार तेस्रोपल्ट पहिलो क्वालिफायरमा स्थान बनाएको हो।
धनगढीले पहिलो संस्करणमा काठमाडौंलाई अतिरिक्त समयमा २–१ ले पराजित गर्दै सिधै फाइनलमा स्थान बनाएको थियो। तर, उपाधि भिडन्तमा भने काठमाडौंले उक्त हारको बदला लिँदै १–० को जित दर्ता गर्यो।
दोस्रो संस्करणमा भने धनगढीलाई पहिलो क्वालिफायरबाट अघि बढ्न निक्कै सकस गर्नुपरेको थियो। २–२ को बराबरी खेलेपछि सिधै फाइनल पुग्ने टोलीको छिनोफानो पेनाल्टी सुटआउटमार्फत गरिएको थियो।
उक्त सुटआउटमा धनगढीले ४–३ ले बाजी मार्दै फाइनलमा स्थान बनायो। तर, निर्णायक भिडन्तमा ललितपुरसँग धनगढी ३–२ ले पराजित हुँदै पुन: एकपल्ट उपविजेतामै सीमित भयो।
यसपल्ट धनगढी दुईपल्टको उक्त पीडा भुलाउने लक्ष्यमा हुनेछ। तर, ललितपुर र धनगढी ‘सेफ साइड’मा पुगे पनि अझै लिग चरणमा समान एक/एक खेल्न बाँकी छ।
ललितपुरले लिग चरणमा अन्तिम खेल झापा एफसीसँग खेल्ने छ भने धनगढीले चितवनसँग। तर, यी दुईका लागि उक्त खेल ‘वाम अर्प’मात्रै हुनेछ। किनभने यी दुई खेलको नतिजाले ललितपुर र धनगढीको समीकरणमा कुनै असर पुर्याउने छैन। तर, झापा र चितवनलाई भने जित अपरिहार्य छ।
अझ झापाले त मंगलबार हुने पोखरा र बुटवलबीचको नतिजा कुर्नुपर्ने हुन्छ। किनभने तालिकामा पोखराको पाँच र झापाको चार अंक छ। चितवनलाई भने पोखरा र झापामध्ये एक टोलीको हार नै दोस्रो क्वालिफायर खेल्न पर्याप्त हुनेछ। यदि पोखरा र झापाले जित निकालेको खण्डमा सात अंक बटुल्दै चौथो स्थानमा रहेको चितवनलाई पनि त्यस्तै नतिजाको खाँचो हुनेछ।
