एनओसीबाट जितेन्द्रबहादुरले पनि दिए राजीनामा

काठमाडौं। विवादित नेपाल ओलम्पिक कमिटी (एनओसी) कार्यसमितिबाट जितेन्द्रबहादुर चन्दले पनि राजीनामा दिएका छन्। नेपाल भलिबल संघका अध्यक्षसमेत रहेका उनले बुधबार एनओसी कार्यसमितिको सदस्सीय पदबाट राजीनामा दिएका हुन्। 

सर्वोच्च अदालतमा विचाराधीन अवस्था रहेको विवादित, मुद्दा युवा तथा खेलकुद मन्त्रालय, राष्ट्रिय खेलकुद परिषद् (राखेप) र अन्तर्राष्ट्रिय ओलम्पिक कमिटी (आइओसी) को पछिल्लो निर्णयअनुसार आफूले राजीनामा दिएको उनले बताएका हुन्।

सर्वोच्च अदालतको आदेश, नेपाल सरकारको निर्देशन र आइओसीको स्वीकृति बेगर जीवनराम श्रेष्ठले पुस १३ गते जबरजस्ती निर्वाचन गरेका थिए। उनले निर्वाचन गर्दा  आइओसी र ओलम्पिक कमिटी अफ एसिया (ओसिए) को प्रतिनिधिको रोहबरमा नै निर्वाचन गरेको जिकिर गर्दै आएका थिए। तर, आइओसी र ओसिएले मंगलबार उक्त निर्वाचनलाई मान्यता दिन अस्वीकार गरेको हो।

‘मैले सर्वोच्च अदालत, ओइओसीको पत्रको साथै नेपाल ओलम्पिक कमिटीसँग धेरै सदस्य संघहरूको असहमति देखिएकोले नैतिकताको आधारमा सदस्य पदमा बस्न उचित नरहेको ठहर गरी आजको मितिबाट लागु हुने गरी राजीनामा दिएको छु,’ उनी भन्छन्।