नौ स्वर्णसहित सुनसरी च्याम्पियन

विराटनगर। सुनसरी जिल्लाले कोशी प्रदेशस्तरीय आइटिएफ तेक्वान्दो प्रतियोगिताको उपाधि जितेको छ।

प्रदेश खेलकुद विकास बोर्ड (कोशी प्रदेश) को संयोजन तथा कोशी प्रदेश आइटिएफ तेक्वान्दो संघको आयोजनमा शनिबार र आइतबार भएको प्रतिस्पर्धामा नौ स्वर्ण, दुई रजत र दुई कांस्यसहित कुल १३ पदक जित्दै सुनसरी पहिलो भएको हो। 

यस्तै, ६ स्वर्ण, तीन रजत र पाँच कांस्यसहित कुल १४ पदक जितेको मोरङ दोस्रो भयो। चार स्वर्ण, पाँच रजत र ६ कांस्यसहित कुल १५ पदक जितेको झापा तेस्रो भयो। 

प्रतियोगिताको उत्कृष्ट खेलाडी पुरुषतर्फ मोरङका मन्जित राजवंशी र महिलातर्फ सुनसरीकी एलिजा राई घोषित भइन्।

शनिबारबाट विराटनगर ९ पुरानो गुद्रीमा सुरु भएको प्रतियोगिता कोशी प्रदेशका नौ जिल्लाका १३५ जना खेलाडीहरूको सहभागिता थियो।