मौका नै पाउँदैनन् दीपेन्द्र र कुशल

काठमाडौं। नेपाली राष्ट्रिय टोलीका उदाउँदा अलराउन्डरद्वय दीपेन्द्रसिंह ऐरी र कुशल मल्ल इन्टरनेसनल लिग टी–२० मा आफ्नो प्रतिभा प्रदर्शन गर्ने अवसरको प्रतीक्षामा छन्। यद्यपि, दोस्रो खेलसम्म पनि उनीहरूले प्लेइङ–११ मा स्थान बनाउन सकेनन्।

दुवै खेलाडी नेपाली टोलीका प्रमुख सदस्य हुन्। तर, यो लिगमा भने उनीहरूले मौका पाएका छैनन्। कुशलसम्मिलित डेजर्ट भाइपर्सले मंगलबार दीपेन्द्रसम्मिलित गल्फ जायन्ट्सलाई ६ विकेटले पराजित गरेको थियो।

यद्यपि, यो खेलमा न त दीपेन्द्रले खेल्न पाए न त कुशलले। यसअघि आइतबार गल्फ जायन्ट्स शरजाह वारियर्ससँग तीन विकेटले पराजित हुँदा पनि दीपेन्द्र बेन्चमै थिए।

यस्तै, भाइपर्सले आफ्नो पहिलो खेलमा आबुधाबी नाइट राइडर्सलाई सात विकेटले हराउँदा पनि कुशललाई मौका दिइएको थिएन। हालसम्मको प्रदर्शनमा भाइपर्स दुई खेलबाट चार अंक बटुल्दै अंक तालिकाको शीर्ष स्थानमा छ भने गल्फ जायन्ट्स अझै आफ्नो पहिलो जितको खोजीमा संघर्ष गरिरहेको छ। 

दीपेन्द्र र कुशल दुवैले घरेलु तथा अन्तर्राष्ट्रिय प्रतियोगितामा शानदार प्रदर्शन गर्दै आएका छन्। त्यसैले यो लिग यी दुईका  लागि अवसर मात्रै होइन, नेपालको क्रिकेट स्तरलाई विश्वसमक्ष प्रस्तुत गर्ने महत्त्वपूर्ण कदम पनि हो। त्यसैले नेपाली समर्थक यी दुईको खेल हेर्न आतुर छन्।