अष्ट्रेलियालाई बोर्डर-गावस्कर ट्रफी 

काठमाडौं । भारतविरुद्धको बोर्डर-गावस्कर ट्रफी अष्ट्रेलियाले जित निकालेको छ । 

सिड्नी क्रिकेट ग्राउण्डमा भारतविरुद्ध पाँचौ टेष्ट क्रिकेटमा ६ विकेटको जित निकाल्दै अष्ट्रेलिया आईसीसी वर्ल्ड टेष्ट च्याम्पियनसिपको फाइनलमा पुगेको हो ।

अष्ट्रेलियाले जितका लागि १ सय ६२ रनको लक्ष्य प्राप्त गरेको थियो । जसलाई उसले तेस्रो दिनको दोस्रो सेसनमा पुरा गर्यो । 

यो जित सहित अष्ट्रेलियाले पाँच म्याचको टेष्ट सिरिज ३–१ ले कब्जा गरेको छ । भारतविरुद्ध अष्ट्रेलियाले १० वर्षपछि टेष्ट सिरिजमा जित हासिल गरेको हो । 
यो जित सहित अष्ट्रेलिया वर्ल्ड टेष्ट च्याम्यिनसिपको फाइनलमा प्रवेश गरेको छ । अब उपाधिका लागि अष्ट्रेलियाले साउथ अफ्रिकासँग प्रतिस्पर्धा गर्नेछ । 

सो फाइनल खेल लड्समा जुन ११ देखि १५ सम्म हुनेछ । भारतीय टिमले लगातार दुई फाइनल खेलेको थियो । तर दुवै फाइनलमा क्रमश न्युजिल्याण्ड र अष्ट्रेलियासँग हार ब्यहोरेको थियो । 

तेस्रो पटक टेष्ट च्याम्पियनसिपको फाइनल पुग्ने भारतीय क्रिकेट टिमको लक्ष्यमा पूर्णविराम लागेको छ ।