तिलोत्तमा मेयर कपको उपाधिका लागि वडा नम्बर १७ र १३ भिड्ने

रूपन्देही। तिलोत्तमा मेयर कप टी–२० क्रिकेट प्रतियोगिताको उपाधिका लागि वडा नम्बर १७ र १३ भिड्ने भएका छन्। फाइनल बिहीबार हुनेछ।

नवजीवन खेलमैदानमा मंगलबार भएको सेमिफाइनलमा वडा नम्बर ५ लाई २१ रनले हराउँदै वडा नम्बर १७ र वडा नम्बर ६ लाई दुईले हराउँदै वडा नम्बर १३ उपाधिनजिक पुगेका हुन्। पहिलो खेलमा वडा नम्बर १७ ले दिएको १४७ रनको लक्ष्य पछ्याएको वडा नम्बर ५ ले निर्धारित २० ओभरमा ६ विकेट गुमाउँदै ११५ रन मात्रै बनाउन सक्यो। 

वडा नम्बर पाँचका प्रतिक भट्टराईले सर्वाधिक ३४ रन बनाए। ओपनर विश्वास भट्टराई र मध्यक्रमका सुसान्त सुवेदी समान १६ रनमा आउट हुँदा अन्यले राम्रो प्रदर्शन गर्न सकेनन्। वडा नम्बर १७ लाई जित दिलाउन मुनेश्वर चौधरीले सर्वाधिक तीन विकेट लिए। 

त्यसअघि टस जितेर पहिला ब्याटिङ थालेको वडा नम्बर १७ ले ६ विकेट गुमाउँदै १४६ रनको योगफल तयार पारेको थियो। वडा नम्बर १७ का अजय यादवले अविजित रहँदै सर्वाधिक ३७ रन बनाए। उनी नै खेलको म्यान अफ द म्याच बनेर एक हजार रुपैयाँ प्राप्त गरे। यस्तै, सुरज चौधरीले अविजित रहँदै ३६ रन जोडेका थिए। वडा नम्बर ५ का गणेश पंगेनीले सर्वाधिक दुई विकेट लिए पनि टोलीलाई जित दिलाउन सकेनन्। 

अर्को खेलमा वडा नम्बर १३ ले दिएको १०४ रनको लक्ष्य पछ्याएको वडा नम्बर ६ ले सबै विकेट गुमाएर १०२ रन मात्रै बनाउन सक्यो। वडा नम्बर ६ का ओपनर सम्राट थापाले सर्वाधिक ३० रन बनाए। विशाल अधिकारीले २५ रनको योगदान दिँदा अर्को एन्डबाट कुनै ब्याटरले सहयोग नगर्दा वडा नम्बर ६ फाइनलबाट बञ्चित हुन पुग्यो। वडा नम्बर १३ लाई जित दिलाउन किशान भुसालले सर्वाधिक दुई विकेट लिए।

त्यसअघि टस जितेर ब्याटिङ थालेको वडा नम्बर १३ ले १० विकेट गुमाउँदै १०४ रन बनाएको थियो। वडा नम्बर १३ का अमन बोहराले सर्वाधिक ३४ रन बनाए भने श्रीधर बस्यालले १८ रनको योगदान दिए। अमन नै खेलको म्यान अफ द म्याच घोषित भए। वडा नम्बर ६ का जय गोदार क्षेत्री र राजिभ खड्काले समान दुई विकेट हात पारेका थिए।