हेडको ‘सेलिब्रेसन’ अश्लील ?
काठमाडौं। मेलबर्नमा खेलिएको टेस्टमा अस्ट्रेलियाले अन्तिम दिन भारतलाई ३४० रनको लक्ष्य दिएको थियो। जवाफमा भारत १५५ रनमा अलआट भयो र अस्ट्रेलिया १८४ रनले विजयी भयो।
यस खेलमा ऋषभ पन्तको विकेट लिएपछि ट्रेभिस हेडले जसरी ‘सेलिब्रेसन’ गरे त्यो यतिखेर सामाजिक सञ्जालमा भाइरल भइरहेको छ। भारतीय समर्थकहरूले यसलाई ‘अश्लील’ भनेपछि अस्ट्रेलियाका कप्तान प्याट कमिन्स स्पष्टीकरण बाध्य भएका छन्। तर, यसको पछाडि ठूलो कारण भने नरहेको उनको भनाइ छ।
३४० रनको लक्ष्य पछ्याउने क्रममा भारतको सुरुआत निकै खराब थियो। स्कोरबोर्ड ३३ रन जोड्दा नै भारतले तीन विकेट गुमाइसकेको थियो। यसपछि ऋषभ पन्तले ओपनर यशस्वी जसवालसँगै इनिङ्स अगाडि बढाउने जिम्मेवारी सम्हालेका थिए।
तर, ५९ औं ओभरमा बलिङ गर्न आएका हेडले आफ्नो ओभरको चौथो बलमा १०४ बलमा दुई चौकासहित ३० रन बनाएर ऋषभलाई आउट गरे। ऋषभ बाहिरिएपछि हेडले अनौठो तरिकाले ‘सेलिब्रेसन’ गरेका थिए। हेडको यो ‘सेलिब्रेसन’को भिडियो भाइरल भएपछि सामाजिक सञ्जालमा हंगामा मच्चिएको थियो।
कप्तान कमिन्सले जितपछि पत्रकार सम्मेलनमा भने, ‘उसको सेलिब्रेसन बरफमा औंला हालेजस्तै थियो। त्यसैले यो केवल मजाक थियो र अरू केही हैन।’
शृंखलमा अस्ट्रेलिया २–१ ले अगाडि छ। खेलको कुरा गर्ने हो भने १२१ रन बन्ने बित्तिकै भारतको चौथो विकेट ऋषभ को रुपमा खस्यो। यसपछि भारतको ३४ रनमै बाँकी सात विकेट खसेको थियो। जसका कारण भारत १५५ रनमै सीमित रह्यो र १८४ रनको ठूलो हार बेहोर्यो। अब शृंखलाको अन्तिम खेल डिसेम्बर ३ बाट सिड्नीमा हुनेछ।
