जुनियर एकलतर्फको उपाधि सूर्यक्ष र पारुललाई

काठमाडौं। नेपाल जुनियर इन्टरनेसनल सिरिजको एकलतर्फको उपाधि पुरुष एकलतर्फ सूर्यक्ष रावत र महिलातर्फ पारुल चौधरीले हात पारेका छन्।

भारतीय खेलाडीहरूको दबदबा रहेको प्रतियोगिताको पुरुष एकलतर्फ सूर्यक्षले अंश नेगीलाई २१–१७, २१–१८ ले पराजित गर्दै उपाधि उचालेका हुन्। यस्तै, महिलातर्फ चौधरीले मेधावी नागरलाई २१–१७, २१–१६ ले पराजित गर्दै उपाधिमा आफ्नो नाम लेखाइन्। पुरुषतर्फ साइप्रसाद तिगला र विश्वजित चौधरी तथा महिलातर्फ इशिता नेगी र दिया भिमैया संयुक्त कांस्य पदकमा सीमित भए।

नेपाल ब्याडमिन्टन संघको आयोजनामा भएको प्रतियोगिताको महिला युगलतर्फको उपाधि आन्या विष्ट र एन्जल पुनेराले हात पारे। उक्त जोडीले दिया भिमैया र बरुणी पर्सवाललाई २१–१४, २१–१८ ले पराजित गरेका हुन्। तेस्रो स्थानमा इशिता नेगी र भान्सिका ठाकुर तथा जेनिथ अब्बिगिल र तारिनी सुरीको जोडी रहे।

पुरुष युगलतर्फ भाब्य छाबरा र परम चौधरीको जोडीले जित हात पार्दै उपाधि जिते। छाबरा र चौधरीको जोडीले दिभ्यान्स अग्रवाल र नीरज केशरीको जोडीलाई २१–१७, २१–१५ ले पराजित गरेका हुन्। तेस्रो स्थानमा दभ्यान्श रावत र योगान्श सिंहको जोडी तथा सी लालरामसँग र सौरभ साहुको जोडी रहे।

मिक्स युगलतर्फ भाब्या छावरा र एन्जल पुनेराको जोडीले गर्भ सानी र इशिताको जोडीलाई २१–१३, २१–१४ ले पराजित गर्दै उपाधिमा आफ्नो नाम लेखाए। तेस्रो स्थानमा सौरभ साहु र प्रगति परिदा तथा बिजोन जैसन र आन्या विष्टको जोडी रहे।

पाँच वटै विधाको सेमिफाइनलमा भारतीय खेलाडीहरूको मात्र प्रतिस्पर्धा रहेको थियो। तीन दिने प्रतियोगितामा सहभागी ९९ खेलाडी मध्ये भारतका ६०, नेपालका १६, थाइल्यान्डका १०, युएईका ४, इरानका ३, न्युजिल्यान्डका २ तथा मलेसिया, अस्ट्रेलिया, बंगलादेश र इन्डोनेसियाका १/१ जना खेलाडीको सहभागिता थियो।