काठमाडौं। चितवन राइनोजलाई नेपाल प्रिमियर लिग (एनपिएल) अन्तर्गत लिगचरणको अन्तिम खेलमा जित्नै पर्ने दबाब थियो र ३२ रनले जित्यो पनि। एक खेलअगाबै प्लेअफमा पुगिसकेको जनकपुर बोल्ड्ससँग एक समय चितवन निरीह देखिएको थियो। कारण हो, जिमी निसमको आक्रामक ब्याटिङ।
मध्यक्रमका ब्याटर जिमीले १८ बलमै अर्धशतक प्रहार गरे। यो एनपिएलकै छिटो अर्धशतक हो। पोखरा एभेन्जर्सका आन्द्रेस गौसले लुम्बिनीविरूद्ध शतक पूरा गरेको खेलमा २० बलमा ५० रन पूरा गरेका थिए। जिमीको उत्कृष्ट ब्याटिङसँगै जनकपुरले खेलमा पुनरागमन गर्ने संकेत देखाएको थियो।
त्यसमाथि १५औं ओभरको पहिलो बलमा जिमीले जीवनदान पनि पाए। सोहिल तन्वीरको बलमा लामो सट खेल्ने क्रममा उनी क्याच भएका थिए। तर, सो बल नो बल भयो। त्यतिबेला निशमले ५८ रन जोडेका थिए। त्यसपछिको फ्रि हिटमा छक्का प्रहार गरेका जिमी चौथो बलमा भने आउट भए। निशमले २४ बलमा ५ चौका र ६ छक्काको मद्दतमा ६५ रन जोडे।
चितवनका कप्तान कुशल मल्ल निसमको यस किसिमको ब्याटिङलाई लुडो खेलाइएको संज्ञा दिन्छन्। भन्छन्, ‘मलाई लाग्छ उनी लुडो खेलिरहेका थिए।’ जनकपुरलाई हराउन जिमीले नै निर्णायक भूमिका खेले। असमझदारीका कारण जनकपुरले चार बलको बीचमा मोहमद मोसिन र अरनिको यादव रनआउटबाट गुमायो। आफैं पनि १४.४ ओभरमा तन्वीरको बलमा रिजन ढकालबाट क्याच आउट भएसँगै चितवन खेलमा फर्किन सफल भयो।
चितवनलाई जित दिलाउन जिमीले मात्रै होइन, कप्तान कुशलले पनि उत्कृष्ट अलराउन्ड प्रदर्शन गरे। कीर्तिपुरस्थित त्रिवि मैदानमा टस जितेर पहिला ब्याटिङ थालेको चितवनले कुशलको ७२ रनको इनिङ्समा १८० रनको योगफल खडा गरेको थियो। कुशलले पाँचौं विकेटका लागि रवी बोपारासँग ११३ रनको साझेदारी गरे। ४१ बलमा तीन चौका र सात छक्का प्रहार गरेका कुशल १८.४ ओभरमा अनिलकुमार साहबाट क्याच आउट भए। ४४ रन बनाएका रवी पनि अन्तिम चार बल बाँकी रहँदा अनिलबाटै क्याच आउट भए। कुशलको ब्याटबाट एनपिएलमा पहिलो अर्धशतक बनेको हो। यो खेल गर या मरको स्थितिमा रहेको कारण यस्तोमा राम्रो ब्याटिङ हुनु सुखद् पक्ष रहेको उनी बताउँछन्।
‘मैले लामो समयपछि राम्रो प्रदर्शन गरें। आजको खेल गर या मरको अवस्थाम थियो। त्यसैले राम्रो प्रदर्शन गर्नुपर्थ्यो। भयो पनि,’ उनले भने। कुशलले ब्याटिङमा मात्रै होइन, बलिङमा पनि आफ्नो जादू चलाए। चार ओभरमा २६ रन खर्चिएका उनले शुभ कंसाकार र ललितनरायण राजवंशीको विकेट पनि लिए। त्यस्तै मोहसिनलाई रन आउट पनि बनाए।
