कर्णालीलाई जित्नै पर्ने खेल

काठमाडौं। नेपाल प्रिमियर लिग (एनपीएल) अन्तर्गत कर्णाली याक्स र लुम्बिनी लायन्स शुक्रबार कीर्तिपुरस्थित त्रिवि क्रिकेट मैदानमा प्रतिस्पर्धा गर्दैछन्। खेल बिहान ९ बजे सुरु हुनेछ।

लुम्बिनी प्रतियोगिताबाट बाहिरिइसकेको छ। आजको नतिजाले टोलीको प्लेअफ यात्रा प्रभावित पार्नेछैन। तर, कर्णाली याक्सका लागि लुम्बिनीविरुद्धको खेल अत्यन्त महत्त्वपूर्ण छ। पाँच खेलबाट तीन जितसहित ६ अंक बटुलेको कर्णाली अहिले चौथो स्थानमा छ र प्लेअफमा स्थान सुरक्षित गर्न जित्नैपर्ने दबाबमा छ।

जनकपुर बोल्ट्सले पहिले नै प्लेअफ स्थान सुरक्षित गरिसकेको छ। बाँकी तीन स्थानका लागि कर्णाली, चितवन राइनोज, पोखरा एभेन्जर्स र काठमाडौं गुर्खाज प्रतिस्पर्धामा छन्। कर्णालीले लुम्बिनीलाई पराजित गरे प्लेअफमा आफ्नो स्थान बलियो बनाउनेछ। अन्यथा चितवन, पोखरा, र काठमाडौंले फाइदा लिन सक्छन्।

पछिल्लो खेलमा कर्णालीले पोखराविरुद्ध उत्कृष्ट प्रदर्शन गर्दै पाँच ओभर बाँकी रहँदै १०४ रनको लक्ष्य पूरा गरेको थियो। यस जितले टोलीको आत्मविश्वास उच्च बनाएको छ। अनुभवी खेलाडीहरूको साथले कर्णालीलाई फेरि उत्कृष्ट प्रदर्शन गर्ने अवसर प्रदान गर्नेछ।

प्रतियोगिताबाट बाहिरिसकेको लुम्बिनी बिना दबाब मैदानमा उत्रिँदै छ। कप्तान रोहित पौडेलले केही नयाँ खेलाडीहरूलाई मौका दिने योजना बनाएका छन्। लुम्बिनीको यो रणनीतिले कर्णालीलाई अप्रत्याशित चुनौती दिन सक्नेछ। खेलको नतिजाले कर्णालीको प्लेअफको सम्भावना मात्र होइन, बाँकी टोलीहरूको यात्रा पनि प्रभावित पार्नेछ।