राष्ट्रिय ‘बी’ चेसमा नायुमाको उत्कृष्ट सुरुआत

काठमाडौं । राष्ट्रिय ‘बी’ चेस च्याम्पियनसिपको पहिलो दिन मंगलबार अनरेटेड खेलाडी नायुमा मगरले दुवै खेल जितेर उत्कृष्ट सुरुआत गरेकी छन् । उनीसँगै महिलातर्फ चार र पुरुष सात खेलाडीले सुरुआती दुवै चरणमा जित हात पारे ।

भक्तपुरस्थित नङ्खेलमा आयोजित प्रतियोगितामा महिलातर्फ हिमालयन चेस एकेडेमीकी नायुमासँगै काठमाडैंकी विनिता कपाली, झापाकी पुनम प्रसाइँ र ईशा गिरिले दुवै खेल जितेर समान २–२ अंक जोडेका हुन् ।

१० वर्षीया नायुमाले चितवनकी १५७० रेटेड उजिभानी कँडेलविरुद्ध एक अंक खोस्दै फिडे रेटिङमा नाम लेखाउने पक्का गरिन् । त्यसपछि उनले हिमालयन चेस एकेडेमीकै ज्योत्स्ना महर्जनलाई पनि पराजित गर्दै २ अंक बनाएकी हुन् । उनले तेस्रो चरणमा १५८८ रेटेड ईशाको सामना गर्नेछिन् । ईशाले पहिलो दिन श्रीशा दुवाल र निहाना श्रेष्ठविरुद्ध पूरा अंक हासिल गरिन् ।

क्लासिकल चेसको पाँच दिने प्रतियोगिताको पहिलो चरणमा १६५२ रेटेड विनिताले एन्जल महर्जन र दोस्रोमा लक्ष्मी कँडेललाई पराजित गर्दै सुखद् सुरुआत गरिन् । उनले तेस्रो चरणमा १५२८ रेटेड पुनमविरुद्ध खेल्नेछिन् । पुनमले माथिल्लो वरीयताकी शान्तिम धिमाल (१६७८ रेटिङ) र सुशीला गुरुङ (१६०१) लाई पराजित गर्दै उत्कृष्ट सुरुआत गरेकी छिन् ।

पहिलो चरणमा बाई पाएकी निहानासँगै शान्ति, सुशीला, उजिभानी, लक्ष्मी कँडेल र एन्जल समान १ अंकसहित शीर्ष १० मा छन् । 

पुरुषतर्फ पहिलो दिन फिडे मास्टरद्वय रिजेन्द्र राजभण्डारी र रुपेश जैसवाल, क्यान्डिडेट मास्टर मिलन लामासहित पुरुषोत्तम सिलवाल, आशिष फुयाँल, धीरेन राई र सानुराज बज्राचार्यले सुरुआती दुवै चरणका खेल जितेर २–२ अंक बनाएका छन् ।

स्वीस प्रणालीको आधारमा सञ्चालित प्रतियोगितामा महिलातर्फ सात र पुरुषतर्फ नौ चरणमा प्रतिस्पर्धा हुनेछ  । महिलातर्फ १७ र पुरुषमा ४० खेलाडी सहभागि छन् । दुवै स्पर्धामा शीर्ष नौ खेलाडी राष्ट्रिय ‘ए’ चेस च्याम्पियनसिपमा छनोट हुनेछन्, जुन माघ दोस्रो साता हुने बताइएको छ ।