काठमाडौं। मार्कस रासफोर्ड र जोशुआ जिर्कजीको दुई–दुई गोलको मद्दतमा म्यानचेस्टर युनाइटेडले आइतबार राति इङ्लिस प्रिमियर लिगमा एभर्टनमाथि ४–० को शानदार जित हात पारेको छ।
सन् २०२१ मा लिड्स युनाइटेडविरुद्ध ५–१ को जित निकालेको थियो। त्यसयता लिगमा युनाइटेडको यो सबैभन्दा ठूलो जित हो। यो जितसँगै १३ खेलपछि १९ अंक जोड्दै युनाइटेड तालिकामा तीन स्थान माथि उक्लिएको छ।
खेलको ३४औं मिनेटमा ब्रुनो फर्नान्डिजको कर्नरबाट आएको बल एभर्टनका डिफेन्डर जाराड ब्रान्थवेटले क्लियर गर्न सकेनन्। उक्त बलमा रासफोर्डले गोल गर्दै युनाइटेडलाई सुरुआती अग्रता दिलाए। खेलपछि रासफोर्डले भने, ‘यो उत्कृष्ट नतिजा हो। नयाँ प्रशिक्षक र नयाँ शैलीसँग हामी अझै सिकिरहेका छौं। अब हामीले यो प्रदर्शनलाई निरन्तरता दिनुपर्छ र आर्सनलविरुद्धको खेलमा पनि राम्रो गर्नुपर्छ।’
खेलको ४१ औं मिनेटमा जोर्डन पिकफोर्डको खराब गोल किकलाई अमाड डायलोले नियन्त्रणमा लिँदै पास गरेका थिए, जसलाई जिर्कजीले सहजै गोलमा परिणत गर्दै अग्रता २–० बनाए।
दोस्रो हाफ सुरु भएको २० सेकेन्डमै अमाडको थ्रु बलमा रासफोर्डले व्यक्तिगत दोस्रो गोल गरे। नेदरल्यान्ड्सका फरवार्ड जिर्कजीले ६४औं मिनेटमा जेम्स टार्कोव्स्कीको पासलाई गोलमा परिणत गर्दै युनाइटेडको जित सुनिश्चित गरे।
खेलका दौरान युनाइटेडका समर्थकहरूले नयाँ प्रशिक्षक रुबेन अमोरिमको नाम लिँदै प्रशंसा गरेका थिए। अमोरिमले जिम्मेवारी सम्हालेयता युनाइटेडले तीन खेलमा अपराजित प्रदर्शन गरेको छ, जसमा इप्सविचविरुद्ध १–१ को बराबरी र बोडो/ग्लिम्टविरुद्ध ३–२ को जित पनि समावेश छ।
पछिल्लो सात खेलमा अपराजित रहेको युनाइटेडले अमोरिमको नेतृत्वमा नयाँ ऊर्जा प्राप्त गरेको छ। मार्कस रासफोर्डले भने, ‘प्रशिक्षकसँग हाम्रो सम्बन्ध बलियो हुँदै गएको छ। उहाँको मनोवृत्तिले खेलाडीहरूलाई सकारात्मक ऊर्जा दिएको छ।’
एभर्टनको भने खराब प्रदर्शन जारी छ। चार खेलमा गोल गर्न नसकेको एभर्टन तालिकाको १५औं स्थानमा छ, रेलिगेसन जोनभन्दा दुई अंक मात्र माथि।
