काठमाडौं। लिभरपुलको सशक्त सुरुआत र म्यानचेस्टर सिटीको कमजोर प्रदर्शनले चेल्सीलाई इङ्लिस प्रिमियर लिगको चौथो स्थानमा उक्लन सहज बनायो। तर, चेल्सीका मुख्य प्रशिक्षक एन्जो मारेस्का यसले आफ्नो क्लब उपाधिको प्रमुख दाबेदार रहेको मान्न नसकिने बताउँछन्।
‘हामी उपाधिको दाबेदार होइनौं। दाबेदारी पनि प्रस्तुत गरेका छैनौं,’ उनले शुक्रबार स्पष्ट पारे। यद्यपि, चेल्सीमा असाधारण प्रगति देखिएको छ। केही समयअघि मात्र प्रशिक्षकहरू बारम्बार फेरबदल र खेलाडीमा अत्यधिक खर्चले चेल्सीलाई चर्चाको विषय बनाएको थियो। त्यसमाथि मैदानमा अकल्पनिय खराब प्रदर्शनले थप दबाब सिर्जना गर्यो। आइतबार राति एस्टन भिल्लासँगको खेलमा चेल्सी अपराजित यात्रालाई निरन्तरता दिने प्रयासमा छ।
यस सिजनको सुरुआतमा चेल्सीले शीर्ष स्थानको लिभरपुलसँग एनफिल्डमा २–१ को हार बेहोरेको थियो। हाल लिभरपुलभन्दा ९ अंकले पछाडि रहेको चेल्सी डिफेन्डिङ च्याम्पियन सिटीभन्दा एक अंकले पछाडि छ। ‘हाम्रो टिममा सुधार भएको देख्दा खुसी छु। यो महत्वपूर्ण छ। तर, हामी यथार्थवादी रहनुपर्छ,’ मारेस्काले भने।
मारेस्का यसै समरमा चेल्सीको चौथो स्थायी प्रशिक्षकमा नियुक्त भएका हुन्। क्लब २०२२ मा अमेरिकी स्वामित्वमा आएको थियो। ४४ वर्षीया इटालियन प्रशिक्षक चेल्सीभन्दा लिभरपुल, सिटी र आर्सनल अहिले पनि अघि रहेको स्वीकार्छन्। ‘यो अंकहरूको कुरा मात्र होइन। तालिकामा उनीहरू हामीभन्दा अगाडि छन् भन्ने कुरा पनि महत्त्वपूर्ण हो। तर, मुख्य कुरा प्रक्रिया हो। पाँच, नौ वर्षसँगै काम गर्ने स्थिरता महत्त्वपूर्ण छ,’ उनले भने।
लिभरपुलका प्रशिक्षक अर्ने स्लटको यो पहिलो सिजन भए पनि जर्गेन क्लोपले तयार पारेको टोलीमा उल्लेख्य सुधार भएको छ। आर्सनलले पनि २२ अंक जोडिसकेको छ। मारेस्काले पेप ग्वार्डिओलाको सहायकका रूपमा सिटीमा अनुभव हासिल गरिसकेका छन्। लेस्टर सिटीलाई प्रिमियर लिगमा फर्काएपछि चेल्सीले उनलाई क्लबको जिम्मेवारी दिएको हो।
‘यो क्षणमा हाम्रो र शीर्ष टोलीहरूको बीचको भिन्नता स्पष्ट देखिन्छ। तर, यसको अर्थ हामी प्रतिस्पर्धा गर्दैनौं भन्ने होइन। खेल जित्ने हाम्रो क्षमता छ। हामी सुधारमा केन्द्रित छौं र यो यात्रालाई निरन्तरता दिन्छौं,’ उनले थपे। युइएफए कन्फरेन्स लिगअन्तर्गत बिहीबार राति चेल्सीले हेडेनहाइमलाई २–० ले पराजित गर्दै उत्कृष्ट प्रदर्शन जारी राखेको छ।
