काठमाडौं। ११ वर्षपछिको भेट, त्यसमाथि पाँच महिनापछि मैदान उत्रिनुको बेग्लै उत्साह। त्यसैले नेपाली टोली कुनै बेला आफ्नै क्षेत्र (दक्षिण एसियाली फुटबल महासंघ साफ) बाट खेल्ने अफगानिस्तानविरुद्धको खेललाई लिएर निक्कै उत्साहित थियो।
अझ अन्तरिम मुख्य प्रशिक्षक नवीन न्यौपानेले त ताजिक राजधानी डुसान्बे उड्नुअघि नै दबीसाथ भनिसकेका थिए, ‘घरेलु टोलीलाई रोक्छौं। तर, अफगानिस्तानलाई त जसरी भए पनि हराउँछौं।’
फिफा वरीयतामा आफूभन्दा ७१औं स्थानमाथि रहेको ताजिकस्तानविरुद्ध उत्रिनु नै नेपालको लागि ठूलो कुरा हो। किनभने यति ठूलो टोलीसँग नेपालले खेल्ने अवसर प्राप्त गर्ने भनेकै विश्वकप र एसिया कप छनोटमा मात्रै हो। तर, यसपल्ट ताजिकिस्तानले नै नेपाललाई मैत्रीपूर्ण खेलमार्फत उक्त अवसर जुराइदियो। पहिलो खेलमा उसलाई घरेलु मैदानमै रोक्ने लक्ष्य बुने पनि त्यो सफल भएन र नेपालले ४–० को फराकिलो हार बेहोर्यो।
त्यसैले दोस्रो खेलमा पनि नेपालले वरीयतामा आफूभन्दा २५ स्थान माथि रहेको अफगानिस्तानसँग सोही खराब लय त दोहोर्याउने होइन भन्ने शंका उब्जियो। हुन पनि हो। कुनै बेला आफू हाबी हुने विपक्षीविरुद्ध नेपालले जित हात नपारेकै १३ वर्ष भइसकेको थियो। त्यसमाथि साफबाट आफ्नो सदस्यता मध्य एसियाली फुटबल संघ (काफा) सारेको अफगानिस्तानले कतारलाई बराबरी र भारतजस्तो बलियो टोलीलाई पनि गत मार्चमै २–१ ले हराएर आफ्नो लेभल नै उच्च भइसकेको सन्देश दिइरहेको थियो।
यस्तोमा नेपालमाथि अफगानिस्तान नै हाबी हुन्छ भनेर कल्पना गर्नु नै मुनासिब थियो। तर, मुख्य प्रशिक्षक न्यौपानेको प्रशिक्षणमा उत्रिएको नेपाली टोलीले भने सबैको अड्कलबाजीलाई नै गलत साबित गर्यो र २–० को नतिजा निकाल्यो।
उनी भन्छन्, ‘पहिलो खेल ताजिकिस्तानसँग हारेपछि यो खेल पनि हार्छ भन्ने सबैलाई लागेको थियो। तर, मलाई भने जित्छौं भन्ने आत्मविश्वास थियो। पहिलो खेलमा एक दिन मात्रै प्रशिक्षण गर्न पायौं। अर्को दिन एकदमै चिसो भएर नतिजा दिन सकेनौं। यो खेलमा मौसम पनि राम्रो भयो। मिडफिल्डलाई पनि पूरै चेन्ज गर्दा योजना अनुसार नै नतिजा मिल्यो।’
प्रशिक्षक न्यौपानेले ताजिकिस्तानविरुद्धको खेलमा पहिलो रोजाईमा मैदानमा उत्रिएका डिफेन्डर सुमित श्रेष्ठ र विमल पाण्डे तथा मिडफिल्डर एरिक विष्ट, रोहन कार्की र भरत खवासलाई ‘बेञ्च’ मा राख्दै फिफा अफगानिस्तानविरुद्ध खेल्ने टिम घोषणा गरेका थिए।
उनले डिफेन्डर अभिषेक लिम्बू, मिडफिल्डर मणि लामा, उत्सव राई, मनीष डाँगी र फरवार्ड आयुष घलानलाई पहिलो रोजाईमा खेल्ने अवसर दिए। कप्तान एवम् गोलकिपर किरण चेम्जोङ, डिफेन्डसमा रोहित चन्द, छिरिङ लामा र सनिश श्रेष्ठ, अग्रपंक्तिमा जिलेस्पीजंग कार्की र अन्जन विष्ट यथावत् राखे। घरेलु टिम ताजिकिस्तानविरुद्ध ५–३–२ को संरचनामा खेलाएका उनले अफगान टिमविरुद्ध ४–३–३ को शैली अपनाए।
खेलको पहिलो हाफ गोलरहित बराबरीमा सकिएको थियो। तर, दोस्रो हाफको सुरुआतमै जेलस्पीजंग कार्कीले नेपाललाई अग्रता दिलाए। ७८औं मिनेटमा रोहित चन्दले राष्ट्रिय जर्सीमा करियरकै पहिलो गोल गरे। त्यही गोलसँगै नेपालले १३ वर्षपछि सहज जित निकाल्यो।
नेपालले अफगानिस्तानविरुद्ध पछिल्लो जित एएफसी च्यालेन्ज कप २०१२ छनोटमा हात पारेको थियो। त्रिपुरेश्वरस्थित दशरथ रंगशालामा १–० (अप्रिल, २०११) मा भएको खेलमा भरत खवासले निर्णायक गोल गरेका थिए। त्यसपछि नेपालले अफगानिस्तानविरुद्ध दुई खेल खेलेको थियो।
साफका ती दुवै सेमिफाइनल (नयाँ दिल्ली २०११ र काठमाडौं २०१३) को भेटमा अफगानिस्तानले बाजी मार्यो। उसले पहिलो सेमिफाइनल अतिरिक्त समय र दोस्रो सेमिफाइनल नियमित समयमै जितेको थियो। काठमाडौंमा भएको अन्तिम भेटमा रोहितले दुईपल्ट पेनाल्टी प्रहार गरे पनि गोल गर्न नसक्दा नेपाल पराजित हुन पुग्यो। तर, यसपल्ट उनले नै नेपाललाई जिताउन महत्त्वपूर्ण भूमिका खेले।
-1731769262.jpg)
डेढ दशकपछि राष्ट्रिय जर्सीमा उनले गरेको गोल पहिलो रहेको थाहा पाउँदा प्रशिक्षक न्यौपानेलाई ‘सर्प्राइज’ मिलेको थियो। उनी भन्छन्, ‘मैले भरखरै थाहा पाएँ। रोहितले यत्रो वर्षदेखि नेपाली फुटबललाई योगदान दिइरहेको छ। सबै क्रेडिट म खेलाडीहरूलाई नै दिन चाहन्छु। यो दुई हप्तामा उनीहरूले गरेको मिहिनेतको नतिजा हो।’
अफगानिस्तानले यो ११ वर्षमा फुटबलमा धेरै परिवर्तन गरेको छ। टोलीका प्राय: खेलाडी विदेशी लिगमा आबद्ध छन्। ती लिगमा बटुलेको अनुभव नेपालविरुद्धको खेलमा पनि देखिएको उनको भनाइ छ। त्यसैले यस्तै ठूला टिमसँग बारम्बार खेलिरहे अफगानिस्तानजस्तै साफबाट नेपाल ‘अपग्रेड’ हुन सक्ने उनले बताए।
‘हामी टोलीमा पनि पोटन्सियल भएका खेलाडी छन्। उनीहरूलाई पनि राम्रो सुविधा दिएर र यस्तै ठूला टोलीहरूसँग प्रतिस्पर्धा गराइरहने हो भने हामी यो क्षेत्रबाट माथिल्लो स्तरमा उक्लिन सक्छौं,’ उनले भने।
-1746755007.webp)
