आइपिएल अक्सनमा नेपालबाट दर्ता भएनन् खेलाडी

काठमाडौं। इन्डियन प्रिमियर लिग (आइपिएल) को नयाँ सिजनका लागि १५ सय ७४ खेलाडी अक्सनका लागि दर्ता भएका छन्।

अक्सन नोभेम्बर २४ र २५ मा साउदी अरबको जेद्दामा हुनेछ।

आइपिएलले नोभेम्बर ४ सम्म खेलाडी दर्ता गरेको थियो। जसमा एक हजार १६५ भारतीय र ४०९ विदेशी खेलाडी दर्ता भएका हुन्। यो सूचीमा ३२० क्याप्ड, एक हजार २२४ अनक्याप्ड र ३० एसोसिएट राष्ट्रका खेलाडी दर्ता भएका छन्।

एसोसिएट राष्ट्रबाट क्यानडाका चार, इटालीका एक, नेदरल्यान्ड्सका १२, स्कटल्यान्डका दुई, युएईका एक र अमेरिकाका १० खेलाडी दर्ता भएका छन्। तर, नेपालबाट एक खेलाडी पनि दर्ता भएका छैनन्। यसअघि नेपाली राष्ट्रिय टोलीका लेग स्पिनर सन्दीप लामिछानेले दुई सिजन दिल्ली क्यापिटल्सबाट आइपिएल खेलेका थिए।