इथियोपियाका तोला तामिरतले रेकर्ड बनाउँदै जिते स्वर्ण

काठमाडौं। इथियोपियाका तोला तामिरतले जुलाईको अन्तिम सातामात्रै पेरिस ओलम्पिक २०२४ को म्याराथनमा वैकल्पिक धावकको रूपमा प्रतिस्पर्धा गर्ने निश्चित भएको थियो, जुन अवसर इथियोपियाकै सिस्से लेम्मा घाइते भएपछि पाएका थिए।

उनै तोलाले पेरिसमा ओलम्पिक कीर्तिमान बनाउँदै शनिबार म्याराथनको स्वर्णपदक जितेका छन्। रियो ओलम्पिक २०१६ मा १० हजार मिटरमा कांस्य जितेका उनले यसपालि इथियोपियालाई पहिलो स्वर्ण दिलाएका हुन्।

उनले दुई घन्टा ६ मिनेट २६ सेकेन्डमा ४२.१९५ किमि पूरा गर्दै ओलम्पिक स्वर्ण कब्जा गरेका हुन्। यसक्रममा उनले तीन वर्षअघि टोकियो ओलम्प्कि २०२० च्याम्पियन केन्याली धावक इलुड किप्चोगेलाई पनि पछाडि पारे।

बेल्जियमका बासिर अब्दीले दुई घन्टा ६ मिनेट ४७ सेकेन्डसाथ रजतपदक हात पारे। उनले टोकयो २०२० मा जितेको कांस्यमा सुधार गरेका हुन्। केन्याका बेन्सन किपरुतोले दुई घन्टा ७ मिनेटसहित कांस्यपदक प्राप्त गरे।