काठमाडौं। श्रीलंकाको पुरुष टोलीले इङ्ल्यान्डका धेरै सहरहरूमा सुरु भएको आप्रवासी आन्दोलनका बीच सुरक्षा चिन्ता व्यक्त गरेको छ। इङ्ल्यान्ड एन्ड र वेल्स क्रिकेट बोर्ड (इसिबी) ले श्रीलंकन क्रिकेट टोलीलाई कडा सुरक्षा व्यवस्था दिने आश्वासन दिएको छ।
इङ्ल्यान्डमा शृंखलाअघि अभ्यास गरिरहेका खेलाडीले पनि चिन्ता व्यक्त गरेका छन्। इङ्ल्यान्डका एक खेलाडीले ईएसपीएनक्रिकइन्फोलाई भने, ‘हामी अहिले जहाँ छौं, त्यहाँ त्यस्तो अवस्था देखिएको छैन। तर, अझै पनि हामी चिन्तित छौं। हामी डिनरका लागि बाहिर निस्कन सक्दैनौं। धेरैजसो समय हामी होटलमा बस्छौं। हामीले बोर्डलाई मुख्य टोली यहाँ पुग्नुअघि सुरक्षा कडा गर्न आग्रह गरेका छौं।’
सात खेलाडी र दुई कोचिंग स्टाफ सदस्यसहित श्रीलंकाली टोलीका नौ सदस्यीय समूहले श्रीलंका क्रिकेट बोर्डलाई आगामी केही दिनको लागि राम्रो सुरक्षा व्यवस्था सुनिश्चित गर्न आग्रह गरेको छ।
इङ्ल्यान्डविरुद्धको तीन टेस्ट म्याचको शृंखलाका लागि टोलीका अधिकांश खेलाडी आइतबार इङ्ल्यान्ड पुग्नेछन्। पहिलो टेस्ट अगस्ट २१ देखि म्यानचेस्टरमा हुनेछ। यसपछि दोस्रो टेस्ट अगस्ट २९ देखि लर्ड्समा र तेस्रो टेस्ट सेप्टेम्बर ६ देखि ओभलमा खेलिनेछ।
बेलायत सरकारले खेलकुदका लागि देश पूर्णरूपमा सुरक्षित रहेको आश्वासन दिएको छ। योसँगै बेलायती प्रहरीले कुनै पनि हालतमा हिंसा रोक्ने बताएको छ।
