नेपालले माल्दिभ्स र उज्बेकिस्तानसँग खेल्दै

काठमाडौं। काभा बिच भलिबल च्याम्पियनसिपको पुरुषतर्फ नेपालले बिहीबार पहिलो खेल माल्दिभ्ससँग खेल्दैछ। यस्तै, महिलातर्फ नेपालले उज्बेकिस्तानसँग खेल्दै प्रतियोगिताको सुरुआत गर्नेछ।

भुटानको राजधानी थिम्पुस्थित चाङ्लिमिथाङ राष्ट्रिय रंगशालामा हुने पुरुषतर्फको खेल दिउँसो २:३० बजे सुरु हुनेछ। महिलातर्फको खेल भने दिउँसो ३:३० बजे सुरु हुनेछ।

शनिबारसम्म चल्ने प्रतियोगितामा नेपालबाट मानबहादुर श्रेष्ठ र दिलबहादुर सुनारले सहभागिता जनाउने छन्। महिला टोलीमा कमला पुन र मनीषा चौधरी छन्। 

सेन्ट्रल एसिया भलिबल एसोसिएसन (काभा) ले आयोजना गरेको प्रतियोगितामा पुरुषतर्फ नेपाल र माल्दिभ्ससहित उब्जेकिस्तान, तुर्केमेनिस्तान र भुटानले प्रतिस्पर्धा गर्नेछन्।