काठमाडौं। सन् २००७ को ट्वान्टी–२० र २०११ को एकदिवसीय विश्वकप जिताउन महत्त्वपूर्ण भूमिका खेलेका गौतम गम्भीरले २००३ मा अन्तर्राष्ट्रिय क्रिकेटमा डेब्यु गरेका थिए।
सन् २००७ देखि २०१२ सम्म उनी भारतीय टोलीका तीनवटै फर्म्याटका नियमित सदस्य रहे। सन् २०१३ देखि उनले अन्तर्राष्ट्रिय क्रिकेटमा पुनरागमनका लागि निकै प्रयास गरे। तर, रोहित शर्मा र शिखर धवनको ओपनिङ जोडी बनेपछि उनी टिम कम्बिनेसनको योजनामा परेनन्।
सन् २०१४ र २०१६ मा उनले इङ्ल्यान्ड र न्युजिल्यान्डविरुद्ध चार टेस्ट खेले। यद्यपि, उनी पुनरागमन गर्न असफल रहे। कोलकाता नाइट राइडर्सको कप्तानी गर्दै उनले सन् २०१२ र २०१४ मा दुई पटक आइपिएलको उपाधि पनि जिते।
गम्भीरले यस अवधिमा घरेलु क्रिकेट पनि जारी राखे र अन्ततः डिसेम्बर २०१८ मा आन्ध्रविरुद्ध रणजी खेलपछि प्रतिस्पर्धी क्रिकेटबाट पूर्ण रूपमा सन्न्यास लिए। त्यसयता उनी सांसद, कमेन्टेटर र आइपिएल टिमका मेन्टरको भूमिकामा देखिए।
सन्न्यास लिएपछि गम्भीर सबैभन्दा पहिले राजनीतिमा लागेका थिए। उनी मार्च २०१९ मा भारतको सत्तारुढ राजनीतिक दल भारतीय जनता पार्टी (भाजपा) मा सामेल भए। भारतमा सोही वर्षको मे महिनामा आम निर्वाचन हुने तय भयो।
गम्भीरले राजधानी दिल्लीको पूर्वी लोकसभा सिटबाट भाजपाको टिकट पाएका थिए। गम्भीरले त्यहाँबाट करिब सात लाख मतले विजय हासिल गरे र सन् २०२४ सम्म सांसद बने।
यस अवधिमा गम्भीरले आफ्नो लोकसभा निर्वाचन क्षेत्रमा धेरै काम गरे, जसमध्ये सबैभन्दा प्रमुख काम कोभिड-१९ को समयमा आफ्नो दुई वर्षको सांसद तलब कोरोना कोषमा सहयोग गर्नुथियो। यद्यपि, पाँच वर्षसम्म सांसद भएपछि गम्भीरले मार्च २०२४ मा राजनीतिबाट पनि सन्न्यास लिए र अर्को आम चुनावमा भाग लिएनन्।
प्रतिस्पर्धात्मक क्रिकेटबाट सन्न्यास लिएपछि गम्भीरले कमेन्ट्री र मिडिया प्यानलिस्टको पनि सहारा लिएका थिए, जहाँ उनी लगातार खेलाडी, प्रशासक र छनोटकर्ताका बारेमा आफ्नो स्पष्ट बयान र तीक्ष्ण विचारका कारण चर्चामा रहे।
गम्भीरले यो काम सन् २०२१ सम्म नियमित रूपमा गरेका थिए, जबसम्म उनी नयाँ आएको आईपीएल टोली लखनउ सुपर जायन्ट्सको मेन्टर बनेनन्। मेन्टर बनेपछि कमेन्ट्रीमा उनको उपस्थिति कम हुन थाल्यो।
यद्यपि, यस समयमा गम्भीरमाथि लगातार आलोचना भइरहेको थियो। सांसद भएको समयमा देशविदेश घुमफिर गरेको र नियमित कमेन्ट्री गरेको भन्दै उनको विरोध हुन थाल्यो।
उनी आफ्नो क्षेत्रभन्दा बाहिर गएको भन्दै चर्को आलोचना पनि भयो। तर, गम्भीरले आफ्नो गैरसरकारी संस्था र सामुदायिक भान्सा (गम्भीरको रसोई) नियमित रुपमा चल्न सकोस् र यसमा कुनै समस्या नहोस् भनेर आफूले यस्तो गरेको बताएका थिए।
गम्भीरले सन् २०२२ र २०२३ को आइपिएल सिजनमा लखनउलाई मेन्टर गरेका थिए र उनको नेतृत्वमा टोली दुवै पटक प्लेअफमा पुगेको थियो। सन् २०२४ को आइपिएलमा उनले आफ्नो पुरानो टिम कोलकाता नाइट राइडर्समा पुनरागमन गरेका थिए र आफ्नो मेन्टरसिपको क्रममा टिमलाई उपाधि दिलाएका थिए।
त्यसयता भारतीय टोलीको प्रशिक्षक बन्ने चर्चा चुलिएको थियो। यसअघि सन् २०१८ को आइपिएलको अन्तिम सिजनमा गम्भीरले कप्तानीबाट राजीनामा दिएका थिए र आफू टिमको मेन्टर रहने बताएका थिए।
अन्तर्राष्ट्रिय क्रिकेटबाट सन्न्यास लिएपछि गम्भीरले लिजेन्ड्स क्रिकेट खेल्दै आएका थिए। सन् २०२३ को डिसेम्बरमा उनले अन्तिम पटक लिजेन्ड्स लिग क्रिकेट खेलेका थिए।
