काठमाडौं । प्रधानमन्त्री केपी शर्मा ओलीले आठौँ राष्ट्रिय खेलकुद प्रतियोगिता समयमै गर्न निर्देशन दिएका छन् । शनिबार राति सरकारी निवास बालुवाटारमा खेलकुद मन्त्री जगतबहादुर सुनार सहित राखेप पदाधिकारीसंग भेट गर्दै प्रधानमन्त्री ओलीले राष्ट्रिय खेलकुद प्रतियोगिता सञ्चालन गर्न अपुग बजेट सरकारले तत्काल निकाशा गर्न तयार रहेको बताएका हुन् ।
‘निर्धारित समयमै प्रतियोगिता आयोजना गर्ने गरि काममा लाग्नुहोस । अपुग बजेटको निकाशा चाँडै हुन्छ । १३ औ साग राष्ट्रको प्रतिष्ठासंग जोडिएको छ । त्यसलाई समेत समयमै गर्नुस ।’ प्रधानमन्त्री ओलीको भनाई उद्वित गर्दै राखेप सदस्य सचिव केशवकुमार विष्टले खेलपाटीसंग भने ।
नेपाली खेलकुदको अवस्थाका बिषयमा जानकारी लिन प्रधानमन्त्री ओलीले खेलकुदमन्त्री सहित राखेप पदाधिकारीलाई बैठकमा बोलाएका थिए । छलफलमा खेलकुद मन्त्री सुनार सहित राखेप सदस्य सचिव विष्ट र उपाध्यक्ष पिताम्बर तिम्सिना सहभागि थिए ।
भेटमा सदस्य सचिव विष्टले फागुनको अन्तिम साता आठाैँ राष्ट्रिय खेलकुद आयोजना गर्ने तयारी गरिएको जानकारी दिदैँ समयमै बजेट निकासा गरिदिन आग्रह गरेका थिए ।
छलफलको सुरुवात गर्दै प्रधानमन्त्री ओलीले खेलकुदको वर्तमान अवस्था र सरकारले गर्न सक्ने सहयोगको बिषयमा जिज्ञासा राखेका थिए । उनले आठाैँ राष्ट्रिय खेलकुद, १३ औ सागका तयारी, खेलकुद संघ भित्रका विवाद, एन्फा भित्रको भ्रष्टाचार लगायतका बिषयमा समेत प्रश्न गरेका थिए ।
जवाफमा सदस्य सचिव विष्टले एन्फाभित्र भ्रष्टाचारको बिषयमा उजुरी परेको जानकारी दिदै स्पष्टिकरण सोध्ने काम अघि बढेको बताएका थिए ।
‘खेल संघ भित्रका विवादका बिषयमा प्रधानमन्त्रीले जिज्ञासा राख्नुभएको थियो । एन्फाको बिषयमा दुई वटा उजुरी परेको छ । स्पष्टिकरण सोधेको छु । जवाफ आएको छैन । चित्त बुझ्दो जवाफ नआए छानविन समिति गठन गर्छु भनेको छु ।’ सदस्य सचिव विष्टले भने ।
प्रधानमन्त्री ओलीले संघ भित्रको विवाद मिलाउने काममा अघि बढ्न सुझाव दिदै दोषी देखिए कारबाही गर्न निर्देशन दिएका थिए ।
