काठमाडौं। अस्ट्रेलिया आइसिसी ट्वान्टी-२० विश्वकपको सुपर एटमा पुगेको छ।
बुधबार बिहान सम्पन्न खेलमा अस्ट्रेलियाले नामिबियालाई नौ विकेटले पराजित गर्दै अस्ट्रेलिया सुपर एटमा पुगेको हो।
नामिबियाले दिएको ७३ रनको लक्ष्य पछ्याएको अस्ट्रेलियाले ५.४ ओभरमा एक विकेट गुमाउँदै ७४ रन बनायो।
अस्ट्रेलियाले समूह बी को खेलमा ओमानलाई ३९ र इङ्ल्यान्डलाई ३६ रनले पराजित गरेको थियो। जितसँगै अस्ट्रेलियाले ६ अंक जोड्यो। अब अस्ट्रेलियाले समूह चरणको अन्तिम खेल स्कटल्यान्डसँग खेल्ने छ। स्कटल्यान्ड तीन खेलबाट पाँच अंकसहित दोस्रो स्थानमा छ।
नामिबियाको दुई अंक रहँदा इङ्ल्यान्डको एक र ओमान अंकविहीन छ। अस्ट्रेलियाका ओपनर ट्राभिस हेडले अविजित रहँदै सर्वाधिक ३४ रन बनाए। १७ बल खेलेका उनले पाँच चौका र दुई छक्का प्रहार गरे।
डेविड वार्नर २० रनमा आउट हुँदा कप्तान मिचेल मार्श १८ रनमा अविजित रहे। नामिबियाका डेविड वीजाले एक विकेट लिए।
त्यसअघि सर विवियन रिचर्ड्स स्टेडियममा टस हारेर पहिला ब्याटिङ थालेको नामिबियाले १७ ओभरमा सबै विकेट गुमाउँदै ७२ रन बनाएको थियो।
नामिबियाका कप्तान गेहार्ड इरास्मसले सर्वाधिक ३६ रन बनाए। ३४ बल खेलेका उनले चार चौका र एक छक्का प्रहार गरे। ओपनर माइकल भ्यान लिगेन १० रनमा आउट हुँदा अन्यले दोहोरो अंकमा रन बटुल्न सकेनन्।
अस्ट्रेलियाका एडम जाम्पाले सर्वाधिक चार विकेट लिए। चार ओभर बलिङ गरेका उनले १२ रन खर्चिए। योसँगै उनले अस्ट्रियाका लागि १००औं ट्वान्टी-२० विकेट पूरा गरेका छन्। जोश हेजलवुड र मार्कस स्टोयनिसले समान दुई विकेट लिँदा प्याट कमिन्स र नेथन एलिसको नाममा एक/एक विकेट रह्यो।
