काठमाडौं। ट्वान्टी–२० विश्वकपअन्तर्गत सोमबार न्यूयोर्क स्टेडियममा बंगलादेश र दक्षिण अफ्रिका आमुनेसामुने हुँदैछन्। जारी विश्वकपमा दक्षिण अफ्रिकाले उत्कृष्ट प्रदर्शन गरिरहेको छ। यस विश्वकपमा बंगलादेशले पनि श्रीलंकालाई पराजित गर्दै राम्रो सुरुवात गरेको छ।
दक्षिण अफ्रिकाका ओटनिल बार्टम्यान र एन्रिच नोर्खी यस विश्वकपमा उत्कृष्ट लयमा छन्। दुवै बलरले अहिलेसम्म ६–६ विकेट लिएका छन्। यी बलरका कारण कुनै पनि विपक्षी टोलीले सम्मानजनक स्कोरसम्म पुग्न सकेको छैन। दक्षिण अफ्रिकाका ब्याट्सम्यानले भने लय समात्न सकेका छैनन्। तर, टोलीमा हेनरिक क्लासेनजस्ता उत्कृष्ट ब्याट्सम्यान छन्।
क्लासेनले २०२४ मा २६ ट्वान्टी–२० इनिङ्स खेलेका छन्। ती इनिङ्समा उनले १९४.६५ को स्ट्राइक रेट र ३९.८५ को औसतमा ८३७ रन बनाएका छन्। क्लासेनले २०२३ को सुरुदेखि नै फ्रेन्चाइजी क्रिकेटमा तीन टोलीका लागि राम्रो प्रदर्शन गरेका छन्।
डर्बन सुपर जायन्ट्सका लागि उनले ४७.६४ को औसत र १८५.७७ को स्ट्राइक रेटमा ब्याटिङ गरेका छन्। ओभल इन्भिन्सिबल र सनराइजर्स हैदरावादका लागि उनको औसत क्रमशः ४६.२९ र ३१.५० छ। यस अवधिमा कुनै पनि फ्रान्चाइजीका लागि उनको स्ट्राइक रेट १६० भन्दा कम छैन।
बंगलादेशका बलरले श्रीलंकाविरुद्ध उत्कृष्ट प्रदर्शन गरेका थिए। उक्त खेलमा रिशाद हुसेन र मुस्ताफिजुर रहमानले तीन–तीन विकेट लिएका थिए। यद्यपि, शकिब अल हसन अझै पनि बंगलादेशका मुख्य खेलाडी हुन्। ट्वान्टी–२० मा पनि शाकिब राम्रो फर्ममा छन्।
पछिल्लो ट्वान्टी–२० विश्वकपपछि बंगलादेशले २२ खेल खेलेको छ। यस अवधिमा शकिबले बंगलादेशका लागि १० खेल मात्र खेलेका छन्। तर, उनले १२ (११.५८) भन्दा कमको औसत र छ (६.०८) को इकोनोमीमा १७ विकेट लिएका छन्।
यो विश्वकपअघि बंगलादेशको टोली खासै फर्ममा थिएन। ट्वान्टी–२० विश्वकपअघि बंगलादेशले अमेरिकासँग तीन खेलको शृंखला खेलेको थियो। उक्त शृंखलामा बंगलादेश २–१ ले पराजित भएको थियो। तर, विश्वकपको पहिलो खेलमा नै बंगलादेश फर्ममा फर्किँदै श्रीलंकालाई पराजित गरेको थियो।
दक्षिण अफ्रिकी टोली पनि विश्वकपअघि खासै लयमा थिएन। वेस्ट इन्डिजसँगको ट्वान्टी–२० शंखलामा ३–० ले पराजित भएको थियो। तर, यस प्रतियोगितामा दक्षिण अफ्रिका अहिलेसम्म उत्कृष्ट लयमा छ।
नेदरल्यान्ड्सविरुद्धको जितमा ब्याट्सम्यानहरुले अलिकति संघर्ष गर्नु परेको थियो। तर, डेभिड मिलरको इनिङ्सले दक्षिण अफ्रिकी टोलीलाई धेरै आत्मविश्वास दिएको हुनुपर्छ।
