काठमाडौं। युगान्डालाई ३९ रनमै अलआउट गर्दै वेस्ट इन्डिजले आइसिसी ट्वान्टी-२० विश्वकपमा लगातार दोस्रो जित हासिल गरेको छ। आइतबार बिहान सम्पन्न खेलमा वेस्ट इन्डिज १३४ रनले विजयी भयो।
जारी विश्वकपमा युगान्डाले बनाएको यो सबैभन्दा कम रन हो। यसअघि अफगानिस्तानको खेलमा युगान्डा ५८ रनमै अलआउट भएको थियो।
सन् २०१४ को विश्वकपमा श्रीलंकाले नेदरल्यान्ड्सलाई १०.३ ओभरमा अलआउट गर्दै ३९ रनमै रोकेको थियो। यो नै विश्वकपमा बनेको सबैभन्दा कम स्कोर थियो।
जितसँगै वेस्ट इन्डिजले समूह सी मा दुई खेलबाट चार अंक जोडेको छ। पहिलो खेलमा वेस्ट इन्डिजले पपुवा न्यूगिनीलाई पाँच विकेटले पराजित गरेको थियो।
युगान्डाको यो दोस्रो हार हो। पहिलो खेलमा अफगानिस्तानसँग युगान्डा १२५ रनले पराजित भएको थियो। तर, दोस्रो खेलमा पुनरागमन गर्दै पपुवा न्यूगिनीलाई तीन विकेटले पराजित गरेको थियो।
युगान्डा दुई अंकसहित तेस्रो स्थानमा छ। वेस्ट इन्डिजले दिएको १७४ रनको लक्ष्य पछ्याएको युगान्डाले १२ ओभरमा सबै विकेट गुमाउँदै ३९ रनमात्रै बनाउन सक्यो।
युगान्डाका जुमा मियाजीले अविजित १३ रन बनाए। उनीबाहेक अन्य खेलाडीले दोहोरो अंकमा रन बटुल्न सकेनन्। वेस्ट इन्डिजका अकील हुसेनले सर्वाधिक ५ विकेट लिए। चार ओभर बलिङ गरेका उनले ११ रन खर्चिए।
अल्जरी जोसेफले दुई तथा रोमारियो शेफर्ड, आन्द्रे रसेल र गुडाकेश मोटीले समान एक विकेट लिए। त्यसअघि प्रोभिडेन्स स्टेडियम, गुयानामा टस जितेर पहिला ब्याटिङ थालेको वेस्ट इन्डिजले निर्धारित २० ओभरमा पाँच विकेट गुमाउँदै १७३ रन बनाएको थियो
जोनसन चार्ल्सले सर्वाधिक ४४ रन बनाए। ४२ बल खेलेका उनले चार चौका र दुई छक्का प्रहार गरेऽ कप्तान रोभम्यान पावेल २३, निकोलस पूरन २२ र ब्रान्डन राजा १३ रनमा आउट हुँदा आन्द्रे रसेल ३० र रोमारियो शेफर्ड ५ रनमा अविजित रहे।
युगान्डाका ब्रायन मसाबाले सर्वाधिक दुई विकेट लिए। अप्पेश रामजानी, कसमस क्यवुता र दिनेश नक्रानीले समान एक विकेट लिए।
