काठमाडौँ। अमेरिका सह–आयोजक भएर आईसीसी टी–२० विश्वकपका लागि छनोट भएको छ। कुनै पनि फर्म्याटमा अमेरिका यो पहिलो विश्वकप हो।
अमेरिकी टोलीको नेतृत्व विकेटकिपर ओपनर मोनांक पटेलले गर्नेछन् भने उपकप्तानको जिम्मेवारी आरोन जोन्सले सम्हाल्नेछन्। घरेलु मैदानमा आयोजना भएको ३ टी–२० शृंखलामा बंगलादेशलाई २–१ ले पराजित गर्दै अमेरिका विश्वकपमा प्रवेश गर्न लागेको हो।
अमेरिकी तीव्रगतिका बलर अली खान बंगलादेशविरुद्धको ३ खेलको टी–२० शृंखला जित्नु संयोग मात्र नभएको बताउँछन्। टोली निकै सन्तुलित रहेको बताउँदै उनले यस्तै ‘अपसेट’ आफ्नो टोलीले आगामी आईसीसी टी–२० विश्वकपमा पनि गर्ने विश्वास व्यक्त गरेका छन्।
‘हामी भोकाएका छौँ र जस्तोसुकै चुनौतीको सामना गर्न तयार छौँ। परिवर्तन गर्ने र हाम्रो आवश्यकताअनुसार समायोजन गर्ने समय हो। टोली निकै सन्तुलित देखिन्छ र खेलाडीमा पनि जितको भोक छ। मलाई विश्वास छ, यसपटक अमेरिकाले पक्कै पनि केही उथलपुथल ल्याउनेछ,’ उनले भने।
यसअघि घरेलु मैदानमा भएको टी–२० शृंखलामा क्यानडालाई ४–१ ले हराएको थियो। अमेरिकाले विश्वकपको पहिलो खेलमा जुन १ मा क्यानडाको सामना गर्नेछ। भारत, पाकिस्तान र आयरल्यान्ड पनि अमेरिका र क्यानडा रहेको समूहमा छन्।
महत्त्वपूर्ण खेलाडी
कोरी एन्डरसनले न्युजिल्यान्डका लागि एक एकदिवसीय विश्वकप र दुई टी–२० विश्वकप खेलिसकेका छन्। गत महिना क्यानडाविरुद्ध अमेरिकाका लागि डेब्यु गरेका उनले दुई इनिङ्समा २८ र ५५ रन बनाएका थिए। एन्डरसनले एक पटक सबैभन्दा छिटो एकदिवसीय शतकको रेकर्ड राखेका थिए। अमेरिका एन्डरसनलाई आफ्नो पुरानो फर्ममा फर्केको हेर्न चाहन्छ।
अली खान अमेरिकी क्रिकेटको सबैभन्दा ठूलो नाममध्ये एक हुन्। पाकिस्तानमा जन्मिएका उनी बाल्यकालमा शोएब अख्तरजस्तै तीव्रगतिका बलर बन्न चाहन्थे। उनी राम्रो गतिका साथ योर्कर बलिङ गर्न सक्छन्।
सन् २०१२ को यू–१९ विश्वकपपछि इयान च्यापलले बायाँ हाते स्पिनर हरमीत सिंहलाई बिशनसिंह बेदीसँग तुलना गर्दै भनेका थिए- यो युवा अन्तर्राष्ट्रिय क्रिकेटको लागि तयार छ। हरमीतले उक्त प्रतियोगितामा भारतका लागि खेलेका थिए।
गत महिना अमेरिकाका लागि डेब्यु गरेका हरमीतले क्यानडाविरुद्ध १७ बलमा अविजित ३४ रन बनाउनुका साथै १८ रन खर्चेर चार विकेट लिएका थिए। सन् २००४ मा च्याम्पियन्स ट्रफी खेलेका उनी यसअघि कहिल्यै विश्वकपमा सहभागी भएका थिएनन्।
अमेरिकी टोली :
मोनांक पटेल (कप्तान), आरोन जोन्स (उपकप्तान), एन्ड्रिज गौस, कोरी एन्डरसन, अली खान, हरमित सिंह, जेसी सिंह, मिलिन्द कुमार, निसर्ग पटेल, नितिश कुमार, नोष्टुश केन्जिगे, सौरभ नेत्रलोकर
