काठमाडौँ। काठमाडौँ क्रिकेट एक्सिलेन्ट सेन्टरले एनसीसीएस महिला तथा पुरुष टी२० क्रिकेट प्रतियोगितामा जित हासिल गरेको छ। सोमबार सम्पन्न खेलमा काठमाडौँले बलपार्क स्पोर्ट्स एन्ड इभेन्ट्स एकेडेमीलाई ५ विकेटले पराजित गरेको हो।
योसँगै समूहमा ‘ए’ मा रहेको काठमाडौँले प्रतियोगितामा विजयी शुरूआत गरेको छ। बालपार्कको भने यो लगातार दोस्रो हार हो। आइतबार सम्पन्न पहिलो खेलमा खेलमा भक्तपुर क्रिकेट एक्सिलेन्ट सेन्टरले बलपार्कलाई डकवर्थ लुइस पद्धति (डीएलएस) का आधारमा १९ रनले पराजित गरेको थियो।
२ अंक जोडेको भक्तपुर शीर्ष स्थानमा रहेको छ। समान अंक जोडेको काठमाडौँ दोस्रो स्थानमा रहेको छ। बालपार्कले दिएको ११८ रनको लक्ष्य पछ्याएको काठमाडौँले १८.१ ओभरमा ५ विकेट गुमाउँदै १२१ रन बनायो। काठमाडौँका राज बमले सर्वाधिक ३९ रन बनाए।
रित गौतम १७ रनमा आउट हुँदा दीपेन्द्र राउत २१ रनमा अविजित रहे। बलपार्कका तिलकराज भण्डारी र अर्थव पौडेलले २/२ विकेट लिए। पंकज पाण्डेको नाममा १ विकेट रह्यो।
त्यसअघि मूलपानी क्रिकेट मैदानमा पहिला ब्याटिङ थालेको बालपार्कले निर्धारित २० ओभरमा ७ विकेट गुमाउँदै ११७ रन बनाएको थियो।
बलपार्कका तिलकराज भण्डारीले सर्वाधिक २८ रन बनाए। आशुतोष घिरौयाले २१ र विवेक रानामगरले २० रन बनाए। काठमाडौँका राज बमले सर्वाधिक २ विकेट लिए। युनिशविक्रम सिंह र सूर्य तामाङको नाममा १/१ विकेट रह्यो।
