काठमाडौँ। वर्षाले प्रभावित खेलमा भक्तपुर क्रिकेट एकेडेमीले बलपार्क स्पोर्ट्स एन्ड इभेन्ट्स एकेडेमीलाई पराजित गरेको छ।
एनसीसीएस महिला तथा पुरुष टी-२० क्रिकेट प्रतियोगिताअन्तर्गत आइतबार सम्पन्न खेलमा भक्तपुरले बलपार्कलाई डकवर्थ लुइस पद्धति (डीएलएस) का आधारमा १९ रनले पराजित गरेको हो।
१३ आभेरमा झारिएको खेलमा १२६ रनको नयाँ लक्ष्य पछ्याएको बलपार्कले ३ विकेट गुमाउँदै १०६ रन मात्र बनाउन सक्यो।
बलपार्कका लागि विवेक थापामगरले अविजित रहँदै सर्वाधिक ३४ रन बनाए। रवि शाह २८ र सुमित महर्जन १९ रनमा आउट भए। भक्तपुरका विकाश आग्री, अमरसिंह रौटेला र दीपक बोहराले १/१ विकेट लिए।
त्यसअघि मूलपानी क्रिकेट मैदानमा टस हारेर ब्याटिङको निम्तो पाएको भक्तपुरले निर्धारित २० ओभरमा ४ विकेट गुमाउँदै १८४ रनको योगफल तयार पारेको थियो।
भक्तपुरका दीपक बोहराले अविजित रहँदै सर्वाधिक ११२ रन बनाए। आयुशमान बम १९ र विनोद तामाङ १६ रनमा आउट भए। बलपार्कका तिलकराज भण्डारी, पंकज पाण्डे र प्रशिद्ध बज्राचार्यले १/१ विकेट लिए।
