काठमाडौँ। भारतीय टोलीका मुख्य प्रशिक्षक राहुल द्रविडको कार्यकाल २०२४ को टी–२० विश्वकपपछि सकिँदैछ। त्यसैले बोर्ड अफ कन्ट्रोल फर क्रिकेट इन इन्डिया (बीसीसीआई)ले मुख्य प्रशिक्षक पदका लागि आवेदन पनि आह्वान गरेको छ।
यसैबीच, मुख्य प्रशिक्षकलाई लिएर सोधिएको प्रश्नमा राजस्थान रोयल्सका निर्देशक कुमार संगकाराले आफूलाई बीसीसीआईबाट कुनै अफर नआएको र समय पनि नभएको बताएका छन्।
‘मलाई सम्पर्क गरिएको छैन र मसँग भारतमा पूर्ण रूपमा कोचिङ गर्ने समय पनि छैन। म राजस्थान रोयल्ससँग आबद्ध छु। म यसैमा खुसी छु,’ उनले भने।
इन्डियन प्रिमियर लिग (आईपीएल) राजस्थान लागि मिश्रित बनेको थियो। १७ अंकसहित अंक तालिकाको तेस्रो स्थानमा रहेको टोली क्वालिफायर–२ मा सनराइजर्स हैदरावादसँग ३६ रनले पराजित भएको थियो।
बीसीसीआई सचिव जय शाहले विभिन्न ढाँचाका लागि छुट्टाछुट्टै प्रशिक्षक नहुने स्पष्ट पारेका छन्। यस्तो अवस्थामा तीनै फर्म्याटका लागि एउटै प्रशिक्षकको खोजी भइरहेको छ।
अब नियुक्त हुने प्रशिक्षकले साढे ३ वर्ष भारतीय क्रिकेट टोलीको जिम्मेवारी सम्हाल्नेछन्। टी–२० विश्वकपपछि द्रविडको कार्यकाल सकिँदैछ। उनले मुख्य प्रशिक्षक पदमा रहन पनि आवेदन दिनुपर्नेछ। बीसीसीआईले आवेदनको अन्तिम मिति २७ मे तोकेको छ।
